Fur laiin i mit ngaihthah suh
Fur laiin i mit ngaihthah suh
Fur ruahtui tlak tam lai hian mit sen deuh rem rum, vûng deuh emaw na sa deuh (burning sensation) i nei a nih chuan mit doctor rawn ngei ang che. Fur lai hian conjunctivitis, meibomitis, corneal ulcer or stye te hi a awm duh hle niin Times of India health section chuan a tarlang.
Ruah kan do hian ruah tui leh kan mit direct-a a inrawn hian kan mit-ah infection chi hrang hrang a thlen thei niin mithiam ten an sawi a, Centre for Sight 9CFS) chairman Mahipal Sachdev chuan, “Corneal ulcers hi a hlauhawm a, mitdelna pawh thlen thei a ni. Viral emaw bacterial emaw fungal emaw avanga mit infection nasa tak a ni. Mit a sen a, a na a, mit ek a awm thin a, khaw hmuh te pawh a tifiahloin a tibuai deuh thei. Hetiang hi ngaihthah hauh loh tur a ni,” a ti.
Mahipal chuan conjunctivitis hi mit infection chuan fur laia tlanglawn ber niin a sawi a, fur lai hian naupang zingah conjunctivitis hi 35-40% velin a pung thin niin a sawi bawk.
Mit-ah hian a var (white) lai leh mitvun chhunglam hi membrane pan tê, conjunctiva an tihin a tuam a, chu membrane chu a lo vûn emaw, a lo sen emawin conjunctivitis an ti thin. Hei hi vaivut, pangpar, damdawi, cosmetics leh contact lens allergy vang te a ni duh hle niin Mahipal chuan a sawi.
Mahipal chuan fur laia mit hrisel nan, “Towel in hmantawm loh a tha a, mimal thil dang pawh in hman tawm loh a tha, a chhan chu infection hi kan kut atangin hmun dang dangah a kai darh thin,” a ti.
Mithiamte chuan fur lai hian mit ro (dry eyes) a awm duh a, chu chuan harsatna chi hrang hrang a thlen duh hle a chung zingah chuan stye pawh a tel niin an sawi.
Delhi-a awm opthalmic surgeon Ritika Sachdev chuan, “Mit ro hi harsatna tlanglawn tak a ni a, computer leh smartphone hman nasat vang leh air-condition hnuaia awm nasat vangin mit ro hi a tam sawt hle. Mit men a nuam lo a, sa deuh hat hat (burning sensation) leh thil hmuh phe deuh te pawh mit ro vang hian a awm thei,” a ti.
Sachdev chuan stye pawh fur laiin a tam duh niin a sawi a,mitvunah arngeng ang deuh a rawn awm thin, hei hi mitvuna oil gland infection vang niin a sawi. Sachdev chuan hetiang kan nei a nih chuan mahni tawka deh (popping) loh tur niin a sawi a, ama tawka a keh hun nghah tur a ni. Tuiluma deh a tha a, chu chuan stye vanga vûng leh na te a tiziaawm thei.