Fury hmachhawn tur Makhmudov
Boxing-ah palian huanga boxer tha ber a ngaih ni reng thin Tyson Fury chuan Oleksandr Usyk laka a tlawm zawn hnuin boxing a chawlhsan. A chawlh renrawn hnuin Fury hi inhnek turin a kir leh dawn a, a hmachhawn leh hmasak ber tur chu Arslanbek Makhmudov a ni.
Tyson Fury hian kum 2015 khan champion lai Wladimir Klitschko hnehin WBA (Super), IBF leh WBO kawnghren a hlawhchhuak. Kawnghren pathum a lak atanga ni 10 hnu lekah a kawnghren chuhpuitu tur Vyacheslav Glazkov aia Klitschko hmachhawn nawn leh a thlan vangin IBF kawnghren laksak a ni thung.
Kawnghren pathum a lak hnu lawkah harsatna lian tak a tawk zui a, ruihlo in a tibuai a, rilru lamah buaina namen lo tak a nei bawk. A harsatna tawh vang hian boxing a chawlhsan a, a boxing boxing licence hlihsak a ni hial a ni. Buaina chhum zing atanga invaichhuak lehin boxing licence a nei thar leh a. Ring chhungah mit la taka inlan in, boxer tha leh huaisen a nihzia a lantir nawn leh.
Kum 2020 khan palian huanga boxer tha leh hnek na zet mai WBC champion Deontay Wilder a hmachhawn a, an inhnek vawi khatnaah inhnehtawk bawk mah se Wilder hi vawi hnih a hneh a, kawnghren a hlawhchhuak leh. A kawnghren chuhpuitu Derek Chisora leh Dillian Whyte te a hneh zui leh a, palian huangah ro a rel chhunzawm. Palian huangah a chak zel laiin May 18, 2024 khan kawnghren pathum kawl kawp mektu Oleksandr Usyk nen kawnghren pali an inchuh a, Fury hi tlawm zawkah a tang a. Usyk chu palian huangah kawnghren pali kawl khawm thei hmasa ber niin record ropui siamtu a ni.
Fury hian Usyk hmachhawn nawn leh mah se tlawm zawkah a tang zui leh a. Usyk laka a tlawm leh hnuin boxing a chawlhsan zui ta a ni. A vawi hnih nana a chawlh hnuin inhnek hmachhawn turin kir leh a duh a, tha zawka inlan turin a inbuatsaih nasa hle. Nasa taka a inbuatsaih hnuin April ni 11 khian inhnek a hmachhawn leh dawn a, a khingpui turi hi Arslanbek Makhmudov a ni.
Fusy leh Makhmudov te inhnek tur hi Netflix in an pechhuak ang. Kum 36 mi Russian boxer Makhmudov hian inhnek vawi 23 a hmachhawn tawhin vawi 21 a chak a, inhnek a hmachhawn hnuhnung ber chu October, 2025 kha a ni a, a khingpui Dave Allen a hneh. A hmachhawn leh tur boxer lar Tyson Fury hneh thei turin a inringtawk hle. Boxer ropui zinga mi Tyson Fury hian inhnek vawi 37 a hmachhawn tawh a, vawi 34 hnehna changin, tlawm zawkah vawi hnih atang a, draw vawi khat a nei bawk.
Vawi 24 zet knockout-a chak tawh Gypsy Kin hian inhnek tura a kir leh tur chu phurawm a tih thu a sawi a. |ha zawka inlan in, kawnghren lak let leh ngei a tum thu a sawi. Makhmudov hi a hneh a nih chuan Anthony Joshua nen inhmachhawn theihna hun tha an nei thei tura ngaih a ni.
Chisora pawh a inlan dawn
Fury kir leh turin thawm lian tak a neih rual hian palian huanga boxer lar pahnih Derek Chisora leh Deontay Wilder te inhmachhawn turin boruak a nei lian viau bawk.
Palian huanga champion hlui Wilder leh kawnghren chuhna inhnek vawi hnih hmachhawn tawha vanduai zawka la tang ve ve Chisora te hi April ni 4 khian O2 Arena-ah an inhmachhawn dawn. Anni pahnih hi kum 13 liam ta khan inhmachhawn an lo tum tawh a. UK-ah dan bawhchhiatna tenau a neih vangin Wilder man a ni a, an inhnek thei ta lo. Incho tawn tak mai an ni a, April ni 4-ah tunge tha zawk an inching fel thei dawn ta a ni.
Kum 42 mi Chisora hian inhnek vawi 50 a hmachhawnna tur a ni a. Ram dangah inhnek a hmachawn vawi 50 na a hmachhawn a nih chuan inhnek a chawlhsan tawh tur thu a lo sawi tawh a. Wilder nen hian an ramah an inhnek dawn ta si a, a chawl zui dawn tho em tih erawh a la chiang lo.
Inhnek vawi 40 hmachhawn tawh Wilder hian Uysk hmachhawn turin chak a mamawh.