Future-a’n thla 6 chhungin No.1 album pathum nei thei

Future album thar ‘Mixtape Pluto’ chu Billboard 200 (albums) chart No.1-ah a debut a, he chart-a a album No.1 kai thei 11-na niin, kumina a album No.1 kai thei pathumna niin, thla ruk chhungin No.1 kai thei album pathum a nei hman. Hetirual hian Katy Perry leh Lil Tecca te pawh top 10-ah an debut e.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album tlukpui leh album-a hla mal hralhna atanga album tlukpui te belhkhawm thin a ni.
‘Mixtape Pluto’ hi kar khat chhungin US-ah 1,29,000 an hralh thei a, chung zinga 1,18,500 chu streaming atanga album hralhna tlukpui (on-demand official stream maktaduai 156.62) niin, album tak tak hralh zat chu 10,000 a ni a, album-a hla mal hralhna atangin 500 a tling thei bawk.
Future hian April thla tir chart-ah a album Metro Boomin nena an inawm ‘We Don’t Trust You’ chu No.1 a kaipui a, April thla tawp chart-ah an album dang ‘We Still Don’t Trust You’ chu No.1 a kai leh a, tunah No.1 album a nei leh ta a, thla ruk chhungin No.1 album pathum a nei hman ta a ni. Future aia No.1 album pathum nei rang thei zawk awm chhun chu Glee Cast niin, 2010 khan thla hnih chhungin an soundtrack album pathum chart No.1 an kaipui hman. Soundtrack album ni loah chuan Future anga thla ruk chhunga No.1 album nei hman hi The Beatles chiah an la awm bawk.
Future hian No.1 album neih tam lamah Eminem, Bruce Springsteen, Barbra Streisand leh Ye (Kanye West) te nih rualin, No.1 album naih tamah pangana an ni a, The Beatles (19), Jay-Z leh Taylor Swift (14 ve ve) leh Drake (13) te chiah a pha lo.
Chappel Roan ‘The Rise and Fall of a Midwest Princess’ chu 1,05,000 hralh lehin No.3 atangin No.2-ah a insawn a, he chart-a Chappell Roan thlen san ber a la ni a, chart No.1 hlui Sabrina Carpenter ‘Short n’ Sweet’ chu 1,00,000 hralh lehin No.1 2 atangin No.3-ah a tawlh a, chart No.1 hlui bawk Post Malone ‘F-1 Trillion’ chu 53,000 aia tam deuh hralh lehin No.4-ah bawk a la awm a, chart No.1 hlui tho Morgan Wallen ‘One Thing at a Time’ chu 53,000 hralh lehin No.5 a la ni.
Katy Perry album tar ‘143’ chu 48,000 hralhin No.6-ah a debut a, he chart-a a album top 10 kai thei parukna a ni. Chart No.1 hlui Taylor Swift ‘The Tortured Poets Department’ chu No.6 atangin No.7-ah a tawlh a, Billie Eilish ‘Hit Me Hard and Soft’ chu 45,000 hralh lehin No.8-ah bawk a la awm.
Lil Tecca album thar ‘Plan A’ chu 42,000 hralhin No.9-ah a debut a, he chart top 10-a lang thei album pali a neihna a ni a, chart top 10 khartu chu Noah Kahan ‘Stick Season’ niin, 38,000 hralh lehin No.9 atangin No.10-ah a tawlh ve thung.