G7 hruaituten Middle East boruak tidai turin ngen
G7 ram hruaitutechuan ‘Gaza-a inkahhai telin Middle East boruak tang tak awm mek chu tidai turin’ an ngen.
Thuchhuah intawm an siamah heng lai hmuna ‘muanna leh nghehna awm chu an duh ber’ a nih thu an tar lang a, ‘Israel chu mahni inven theihna dikna chanvo nei’ niin an sawi bawk.
US President Donald Trump-a chuan Canada-a intawh khawm neih mek hi ruahman lawk aia hmaah a hawsan a, “Chhan tha tak avangin ka kir tawh a ngai,” tiin thuthar lakhawmtute a hrilh.
Trump-a a haw mek lai hian Israel leh Iran chu a ni ngana atan an inbei zui mek zel a. A haw rualin White House National Security Council nen an inhmu dawn nia sawi a ni.
US Defence Secretary Pete Hegseth-a chuan an invenna atan Middle East-ah an inchhawp belh dawn tih a sawi a; mahse, American thuneitute chuan Israel-in Iran a beih mekah an pui dawn lo tih an sawi thung.
White House Press Secretary Karoline Leavitt-i chuan Trump-a hian Thawhtannia Kananaskis-a zanriah a kil zawhah a chhuahsan thu sawiin ‘Middle East-a thil thleng mek vang’ niin a sawi a, a sawi zui thui lo.
US president hian summit neihnaa Ukrainian President Volodymyr Zelensky leh Mexican President Claudia Sheinbaum te nen inbe tura ruahmanna siam tawh chu a tihlawhtling thei ta lo a ni.
Thawhtannia photo session-ah Trump-a hian Washington-a a kir thuai a ngaih thu sawiin social media-ah Iran chuan tun hnaia nuclear chungchanga an inbiaknaa an sawi angin inremna a ziak ngei a ngaih thu a sawi bawk.
“Mawlmang taka sawi chuan, IRAN HIAN NUCLEAR RALTHUAM A NEI THEI LO,” tiin a tar lang.
Trump-a hian a social media platform Truth Social-ah Iranian-te chu an khawpui, mihring maktaduai 17 chenna chu ‘rang taka chhuahsan turin’ a ti bawk.
Hemi hnu lawk, Thawhlehni hma takahah Iranian chanchinbute chuan Tehran-ah thil puak leh air defence kah chhuah nasa tak a awm thu an tar lang nghal a. Hemi hma lawk hian Israel-in Iran sorkar thupuannaa thil pual mek chu an studio a kap fuh bawk.
Israel-ah pawh Tel Aviv-ah air raid siren tihrik niin Iranian missile-in a kah avangin thil puak ri hriat tur a awm reng.
G7-a tel ram hruaitute chuan Trump-a haw hma hi an hre thiam a. “United States hian inkahhai a tihlawhtling thei a nih chuan a tha dawn hle a ni,” tiin French President Emmanuel Macron-a chuan a sawi.
Australian Prime Minister Anthony Albanese-a thupuangtu pawhin Trump-a haw hma chu ‘hriat thiam awm’ a tih thu a sawi bawk.
Get real time updates directly on you device, subscribe now.
Prev Post