G7 ten Russia sum Ukraine hnenah pe

G7 ram te chuan Russian asset an hreksak atangin $50 billion lai chu Russian forces te a beihlet nan Ukraine hnenah pek an rem ti.
US President Joe Biden chuan tlawm kan tum lohzia Russia hnena hrilh hriat nawn lehna a ni tia sawiin mahse Moscow thung chuan chhanletna na tak an pek tur thu a sawi thung.
He sum hi kumin kum tawp dawnah chauh pekchhuah hman a ni dawn thung a, mahse, Ukraine-in a economy a siam that nana pawimawh tak tur a ni thung.
Italy a G7 summit neihnaah Ukrainian president Volodymyr Zelesnky leh Biden te chuan 1-year bilateral security deal hming ziah hnan dun bawkin chu chu Kyiv chuan chhinchhiahtlak tiin a sawi zui bawk.
Inremna angin US military and training aid chu Ukraine hnenah a pe dawn a, mahse, Washington chuan sipai erawh a tirlut lo thung ang.
Kum 2022 a Russia in Ukraine a run hnuah Russian asset $325 billion vel lai chu EU leh G7 ram ten khawihchet theihlohin an hrensak a ni. Heng asset te hian kum khatah $3 billion interest vel a nei a ni.
Tuna ruahmanna siamah $3 billion interest chu Ukrainians te hnena international market atanga $50 billion loan pek annual interest rulh nana hman a ni hlauh dawn a ni.
Southern Italy a Puglia a joint news conference neihnaah President Biden chuan $ 50 billion loan chuan Ukraine tan thiltha ti dawnin chutihrual chuan Russian president Vladimir Putin chu kan tlawm dawn lo tih kan hrilhhriat nawn lehna a ni tiin a sawi.
US leader chuan Putin chuan ‘min tlawm dawn lo va, min thenhrang thei ngai dawn lo va, he indona a tawp hma chuan Ukraine kan thlawp tlat a ni’ tih a hrefiah mai ang a ti bawk.
President Zelensky chuan American leh thawhpui ram dang ten an thlawpnaah lawmthu a sawi a.
US nena secutity deal an siam chungchang pawh sawiin, “Ni chhinchhiahtlak a ni a, kum 1991 a independence ram kan nih hnua inremna kan siam tawha la tha ber a ni” tiin a sawi.
G7 leader dang te pawhin $50 billion loan chu fakin UK Prime Minister Rishi Sunak chuan ‘game changing’ tiin a sawi bawk.
US chuan kumin May thla khan Ukraine hnenah $61 billion pek a lo remti tawh bawk a. Kyiv chuan a hma atangin Russian sum te hi pek a lo ngen tawh a, G7 ram te hnenah a interest chauh ni lo frozen fund atagin $300 billion tal pe turin a lo ngen tawh a, mahse, chu chu European Central Bank chuan a hnawlsak a ni.
US aid package ang lo takin tuna G7 tena sum pek an remtih hi chu kumin kum tawp lamah Ukraine in a hmang thei dawn chauh a, chuvang chuan tun tut tuta indona kalpui mekah chuan awmzia a nei thei dawn lo.
Ukraine chuan tuna a mamawh ber chu ralthuam a nih thu sawiin a biktakin Russia missile leh drone te kapthla tur air dfence system a mamawh thu a sawi a, hei bakah hian F-16 jets te pawh nghak mekin tun summer hian Kyiv chuan a hmang hman tura ngaih a ni thung.
Zelensky chuan US nena inremna an siamah indo thlawhna te chu a tel thu a sawi bawk a. Tuna Ukraine loan pek hian awmzia thuk tak neiin Russia chu chhiatna a thlente a man a chawitir mai bakah a sum ngei chu Ukraine-in invenna tha a neih theih nan a pe ang a ni bawk.
Ukraine hnena loan pek hian Ukraine indonaah Russia chu a inlamlettir mai dawn lo thung a. Russian frozen assets tam ber chu Belgium a Central Bank of Russia a dah a ni a. International law hnuaiah chung asset te chu Russia chhuhsaka Ukraine hnena pek ngawt a remti lo.
G7 tena thutlukna an siam hnu lawk hian Russian Foreign Ministry thupuangtu Maria Zakharova chuan chhanletna na tak pek a ni ang, tiin a sawi nghal thung.