Gabon thuneitu thar Gen Brice Oligui Nguema

Gabon-a Army officer an ram thuneihna la tute chuan General Brice Oligui Nguema chu transitional leader atan an puang a.
Gen Nguema hi a hmain capital Libreville ah a sipai ten kawngzawhpuina an nei tawh bawk a.
President paihthlak tak Ali Bongo chuan a chenna In atanga ngenna siamin ‘khawvel hmun hrang hranga ka thian te u’ tia sawiin amah avanga ‘bengchheng’ siam turin a ngen a ni.
French colony hlui Gabon hi Africa-a oil producer lian ber pawl a ni a. Bongo paihthlak a nih takah hian an chhungkuain kum 55 lai thuneihna an chan chu tihtawpin a awm ta a ni.
Army officer te chuan Nilaini khan TV kaltlangin thuneihna an chan tak thu an puang a. Kar kalta Inrinnia inthlan result a Bongo chakna leh opposition tena an sawisel chu an hnawl thu an puang a ni.
Hei bakah hian sipaite chuan Bongo fapa chu phatsantu tiin an man zui bawk a. Sorkar paihthlak a nih hnu lawkah sipai general rual te chuan inhmuhkhawmna nei nghalin lungrual takin Gen Nguema, presidential guard hlui chu leader atan an pawm thu an puang zui nghal a ni.
Libreville khawpui leh hmun dang dangah sipai tena thuneihna an chan chu mipui ten lawma fakin lawmna an nei hial a. Mahse, sorkar paihthlakna chu UN, African Union leh France te Bongo family te nena inzawmna tha tak neite chuan an dem thu an sawi thung.
US state department chuan Gabon military te chu ‘civilian rule’ humhim tura ngenin ‘an mi man te chhuaha sorkar mi leh sate humhim’ turin an ngen bawk a. UK chuan ‘constitutional kalha chetlakna’ chu an dem thu an sawi ve thung.
Gen Nguema hi kum 48 chauha upa niin Ali Bongo pa kum 2009 a thi tawh leh kum 42 lai rorelna lekkawh Omar Bongo thuihhruai hnai tak a ni a. Kum 2005 atanga a thih thlengin Omar Bongo nena inhnaih tak tia sawi a ni.
Ali Bongo hnuaiah Morocco leh Senegal a Gabon embassy a military attach angin bul a tan a. Kum 2018 khan intelligence chief ah dah niin a hnuah general a hlankaiin a awm leh a ni.
Kar kaltaa Gabon inthlanah opposition candidate Albert Ondo Ossa chuan polling station tam takah ballot paper-a hming chuanna a awm lo tia sawiin chumai bakah candidate inhnukdawk tawh te hming tam tak a la awm thung tih a ni bawk a.
Tun hmaa Bongo-an inthlana chakna a chan te pawh vote tihchingpen tia sawi a lo ni tawh thin a. Tunah pawh inthlan hma lawk karah voting paper te thlak danglamin a awm tih a ni bawk.
Kum 2018 khan Ali Bongo chu stroke avanga talbuaiin kum khat dawn chu che hlei thei lova awmin bang tura nawrna a nasa hle a. A kum leh lawkah sipai ten paihthlak an tumna tlawlhin chung paihthlak tumtute chu lung ina khungin an awm zui thung.