Gaddafi-a fapa, Saif al-Islam kah hlum a ni
Libya hruaitu thin, Col Muammar Gaddafi-a fapa, Saif al-Islam Gaddafi-a chu kah hlum nia sawi a ni.
Thawkkhat laia a pa aiawh thei tura rinkai ni phak, kum 53 mi thih thu hi a political team-a hotuin Thawhlehni khan a sawi niin Libyan News Agency chuan a tar lang.
A dan hre mi chuan ‘commando paliin’ Zintan khawpuia an inah an kap hlum niin a sawi a, tute nge an nih erawh hriat a ni lo.
A farnu erawh chuan an ram leh Algeria inrina bulah a thi niin Libyan TV a hrilh ve thung.
Saif al-Islam Gaddafi-a hi thawkkhat lai khan an rama mi ngaihzawn rawn leh hlauh niin kum 1969 atanga mipuiin kum 2011-a an paih thlak thlenga an ram roreltu, a pa hnung zuia a aiawh thei tura ngaih a ni thin.
Kum 1972-a piang niin kum 2000 atanga Gaddafi-a rorelna tawp thlenga Libya-in khawthlang ramte a pawh thar lehnaa hmalatu langsar a ni.
A pa paih thlak a nih hnuah Saif al-Islam Gaddafi-a hi sorkar duh lohna lantirtute laka na taka cheah a pa eptu hel pawlten puhin Zintan-ah kum ruk dawn a tang.
International Criminal Court pawhin kum 2011-a a pa eptute lungawi lo laka a chet dan avangin a chungthu ngaihtuah a duh em em a ni bawk.
Kum 2015 khan amah an man lo chungin an ram khawthlang lam, UN thlawp sorkar dinna, Tripoli-a court chuan mipuite laka a chet dan avangin thi turin a lo hrem tawh a. Kum hnih hnuah khawchhak lam, Tobruk-a helhovin ngaihhnathiamna dan an neih hmangin an chhuah leh thung.
Gaddafi a rorelna a tluk hnuah Libya hi hel pawl chi hrang hrangin ram bil tete neiin an thunun hlawm a, tunah pawh sorkar inep pahnihin an thunun mek.
A pa hruaitu a nih lai khan sorkarah chanvo pawimawh nei lo mah se sorkar kal dan leh mi dawrnaah a inhnamhnawih nasa hle a, hei hian a pa nuclear weapons programme tawpna pawh a thlen.
Hei vang hian African hmar lam ram hi ram dangin an hrekna an hlih phah a, mi tam tak chuan ram siam thatu leh Libya kal dan thlak danglamtuah an ngaih phah.
A pa aiawhtu nih mai erawh a duh loh thu a sawi thin a, thuneihna chu ‘inthlahchhawn tur a ni lo’ tih a sawi thin a. Kum 2021 inthlanah erawh president chuh a tum a; mahse, inthlan hi tun thlengin sawn a la ni ta rih a ni.