Game 5-a goal 8 thun thei Messi

Inter Miami forward thar Lionel Messi chuan Inrinni Leagues Cup quarter-final match-ah goal khung lehin, Char-lotte lakah a team chu 4-0 hnehna a chanpui a, Paris St-Germain chhuahsana Major League Soccer club a vawn hnuah game nga khelin goal riat tehreng a thunsak tling der tawh!
World Cup winner Messi hi Florida inkhelah hian a langsar nghal vut vut bik lo a, second half minute 86-a Miami goal lina a thawh hma thleng kha chuan thei reh takin a reh a, mahse, Arab rama goal khung thulh thei lo Argentine hian a khelha a lansarh loh tum pawhin goal thun loh a ngai thei lo!
Tarlan tawh thin angin, July thla maia kum 2025 thleng daih tur contract ziak thar hlim Messi lo lan hmaa an game hnuhnung 11-ah Miami an chak zo lo fai vek a, kum 36 mi an chhawr hnua an game hnuhnung pangaah Inter Miami an chak fai vek thung si!
Miami hian vawiin semi-final match-ah Philadelphia Union an hmachhawn leh ang.
Inrinni quarter-final inkhel luhchilh zui leh ila. Miami hian first half minute 12-na lekah penalty hlawhchhuakin Josef Martinez chuan a chhuihlut a; first half-ah vek hian Robert Taylor chuan DeAndre Yedlin siamsakin an goal hnihna a thawh ve leh.
Charlotte hian se-cond half-ah goal hnih dang chhuah belh lehin, a hmasa zawk chu Messi chawm tuma Diego Gomez cross ball vawrhchhuah chu anmahni lam goal-ah defender Adilson Malanda chuan a tilut palh a; tarlan tawh angin, a hnuhnung zawk leh he inkhela Miami goal lina ni zui ta chu Barcelona leh Paris St-Germain forward hluiin Ecuador striker Leonardo Campana thawhrah atanga a tihluh a ni.
Last-16 lamah khan FC Dallas lakah Inter Miami an talbuai hle a, 4-4-a an tawp hnu penalty petah Miami an chak hram a; last eight lamah erawh nuamsaa hnehna changin, an manager Gerardo Martino chuan si an chhuah loh avanga a hlim thu inkhelh banah a sawichhuak nghe nghe.