Game hloh loa chak Swiatek

Game hloh loa chak Swiatek
Top seed Iga Swiatek chuan French Open hmei-chhe singles title a kawl lai humhim tura a chet-chhuahnaah kawngdik zawh zelin, Inrinni khan a career-a tum li ngawt 6-0 6-0 hnehna a channa ni turin Roland Garros-ah Wang Xinyu a nawp a, grand slam tournament bikah tun hi game hloh miah loa a chak vawi-khatna a ni nghal.
Chinese player sawp chunga French Open fourth round a luh hnuah Poland nula chuan inthlahdah a duh ngai loh thu leh a match khelh leh turah pawh theihtawp a chhuah zui leh tur thu a sawi.
A tumthumna atana Roland Garros title beisei leh mek Pole hi a tumpuite a sawp changa uang-thuang ngai lo leh a sawpte tana ngaihthlak nuam lo tawngkam chhakchhuak ngai loa hriat hlawh a ni a, vawi duai lo 6-0 or 6-1 scoreline hmangin set a la tawh a, chutianga set lak chu ‘bagel’ leh ‘breadstick’ tia sawi thin niin, hneh-sawh taka a tumpuite a sawp tum pawhin a khelh leh tur lama inthlahdah leh thatchhe zawka khelmual luh a duh ngai lo!
World number one hian last 16 lama Lesia Tsurenko a tum leh dawn a, champion lai hma-chhawn thei turin inkhel dangah Ukrainian hian 2019 US Open winner Bianca Andreescu chu 6-1 6-1-in a sawp ve bawk.
Roland Garros grand slam tournament tan hma lawk inbuatsaihna tourna-ment Rome-ah khan a malpui tha tina bawk mah se Swiatek hian tun thlengin a taksa lamah harsatna a la nei lo a, a khelh that dan level sang ber zelin a la inlan thei.
Belarusian second seed Aryna Sabalenka ang bawkin Swiatek pawh hi clay-court Grand Slam khelh meka champion thei tura rinkai niin, anni pahnih baka rinkai dang Kazakh fourth seed Elena Ryba-kina chu a inhnukdawk a; WTA Tour-a ‘big three’ tih hming lo chhuak thara a lungthu tikimtu Rybakina hi Roland Garros a thlen hnuah damlohnain a tlakbuak ta tlat a, straight set ve ve hmanga a tumpui hmasa pahnih a hneh hnuah third-round match khel hman loin a inhnuk-dawk ta mai a ni.
Wimbledon champion Rybakina hi Inrinni inkhel danga Spain nula Sara Sorribes Tormo hma-chhawn tur a nih laiin khelmualah a inlan thei ta lo a, a hnuah a dinhmun sawiin kum 23 mi Kazakh chuan nihnih a mut that tawh loh thu leh khawsi nunain a tlakbuak tih a sawi a, tlan leh thawk thlenga a sak tlat avangin inhnuhdawh mai chu a tan thutlukna dik ber nia a hriat thu a tarlang tel.
French Open inbuat-saihna Italian Open-a champion Rybakina inlan zui thei ta lo hi Polish world number one Iga Swiatek le Belarusian world number two Aryna Sabalenka-te tan thawk huaina tham a tling awm e!
Hmeichhe tennis big three an tihte hian Grand Slam title hnuhnung pali kha an hui fai vek a ni.
Nizan fourth-round result tarlan hman loh pakhatah world number two Aryna Sabalenka chuan unseeded Sloane Stephens a hmachhawn a; 2017 US Open champion Stephens nena tunhma lama vawithum an intum tawhah Sabalenka a la tlawm ngai lo a, kumin January thla Australian Open champion hian a zawna Grand Slam title lak a tumna kawngah Ameri-can mihang player hi a hneh leh ngei rin a ni.
Khelmual lut se tlawm ngei tura ngaih ngheh world number 126 Sorri-bes Tormo chuan inkhel hah loin fourth round a lut a, Russian 23rd seed Ekaterina Alexandrova leh Brazilian 14th seed Beatriz Haddad Maia inkhela chak zawk zawk a nghak.
Inrinni third round in-khel dangah American sixth seed Coco Gauff chuan set khatna hloh zet chungin kum 19 mi lek ni ve tho mah se tawnhriat nei tam zawk a nihna chhawrin Russian tleirawl kum 16 leka upa Mirra Andreeva lakah 6-7 (5-7) 6-1 6-1 hnehna a sualchhuak.
Nikum Paris clay final-a Swiatek laka tlawm Gauff hian Slovakian world number 100 Anna Karolina Schmiedlova lakah fiahna khawng zawk a hma-chhawn leh ang.
Seventh seed Ons Jabeur pawh fourth round lut zingah telin, he hmun thleng tur hian set a hloh zet hnuah Serbian qualifier Olga Danilovic chu 4-6 6-4 6-2-in a paltlang.
Tunisian Jabeur hi kumin Roland Garros-a set la hloh lo Danilovic lakah a talbuai hlen duh lo a, 6-4 7-6 (7-2)-a Italy player Elisabetta Cocciaretto hnehtu American Bernarda Pera a tum leh ang.