Nikum final-a an hneh loh laka TNT phuba lakna

Thutak Nunpuitu Team-in tha takin nikum final-a an tlawmna an chhanglet nghal a, karliamta Zirtawpni zanah Tata SK 712 Pro Volleyball League hawnna’n set hloh loin Durtlang North an hneh.
R. Dengthuama Indoor Stadium, Mualpuiah Vanlaltanchhana leh Zosangzuala’n point 30 chuang thawkchhuakin TNT an fuihphur a, 25-11, 25-21, 25-23-in an chak.
Inkhel tan hmain Mizoram State Sports Council vice president V. Lalzawmliana’n Pro Volleyball vawi rukna a hawng a; Durtlang North-in kum 38 mi Zomuanpuia thlahna hun hmangin, kum kaltaa champion-puitu leh an captain ni thin hnenah pangpar leh ngaihhruina thuziak an hlan.
May ni 27, 2022 khan set thum set khatin Durtlang North an hneh lo a, a tum hnihna’n final-ah TNT an tlawm. Pro Volleyball inkhel awm leh hmasa berah an intawng leh nghal a, captain Vanlalchhantluanga Sailo chuan a service hmangin point hmasa ber a hmu.
Mizo hlanga champion tum TNT-in hma lam pan chhunzawmin, nikuma Mizo player tha ber lawmman dawngtu Valbuanga’n point 23 hmuin tum nga a tisual a, phu taka team a chakpui hnuah D3 Business Player of the Match lawmman hlan a ni.
An chak theihna’n Zosangzuala’n point riat thawkchhuakin vawi thum a hloh a, Bawiha Sailo chuan hloh loin point ruk a hmu bawk. TNT hian hun tepterah tel lo tura ngaih tawh setter rinrawl Lalliankima leh spiker Laldin-chhunga an kokir a, nung takin an khel tluan.
Durtlang North-in Zomuanpuia leh an elpui Chhinga Veng Spikers-a insawn ta Lalbiak-muana tel loa Pro Volleyball an khelh hmasak berah Karnataka captain Anup D Costa lalut mah se an insiamrem hman lo.
Chiang taka set khatna an hloh hnuah hmasawn hret mah se an hriam zo chuang lo a; set thumna tirah captain Fabian Lallung-hnema’n vaw tla zawnin 6-2-in hma an hruai a, an tawnsan lai ber niin, mimal leh team inelna hrang hrangah Valbuaia hoin TNT an chungnung tluan a ni.
Durtlang North tana a khelh hmasak berah Anup chuan point 18 hlawhchhuak mah se point 10 a paih a, Fabian-a’n point riat hmuin tum nga a tisual a, R. Vanlalmawia’n point hnih hlohin point ruk a hmu thung.
June ni 12-ah TNT-in Tuichangral an khelhpui leh dawn a, kartawp Inrinni zanah Durtlang North-in Hunthar hmaah fiahna dang an hmachhawn leh dawn a ni.
Bungkawn lakah Bethlehem VT chungnung
Bethlehem Vengthlangin title humhim thei turin bul an tan fuh hle a, karliamta Inrinni zan Tata SK 712 Pro Volleyball League hmeichhe inkhel hmasa berah 3-1-in Bungkawn an hneh.
R Dengthuama Indoor Stadium, Mualpuiah Elisian Medai chuan Bethlehem Vengthlang tan rin tlakin a khel a, 25-15, 17-25, 26-24, 25-20-in team a chakpui.
Nikum final-ah Bungkawnin F. Lalparmawii hoin set hmasa ber an la a; a hnuah Elisian chuan Bethlehem Vengthlang fuih phurin set thum an la zawn a, a vawikhatna’n Mizoram volleyball inelna sang berah an champion.
An intawn lehna hmasa berah nikuma player tha ber Serkawn Lunglei nula Elisian hian point 25 hmuin, point 11 hloh mah se D3 Business Player of the Match lawmman a dawng leh nghal a ni.
Bungkawnin a tir lamah ho taka point hloh an ngah a, chiai taka an khelh laiin Bethlehem Vengthlangin harsa lovin set hmasa ber an la. Bungkawn insiamthain, awmze neiin spiker rinrawl F-i leh PC Lalrinpuii an inlan a, kawng dikah team an hruaikir.
Inelna sang hmachhawn dunin he inkhela chak tur tihfelna pawimawh set thumnaah Elisian a langsar. Mimala a elpui F-i nen team tan an tangkai zual lai a ni a, 25-24-a hma an hruai laiin Bethlehem Vengthlang spiker hian net perin a vaw tla a, set an la.
A hnuah kirleh tumin Bungkawnin 12-6, 16-12-in hma an hruai na a, inrintawkna sang zawk nen Bethlehem Vengthlangin an nawrlet hneh a, eng boruakah pawh ngampa leh thunei takin an khel thei tawh.
Bungkawnin an anmahni tihsuala an point hloh zawn chhoh an tuar a, point 20 an hmu ve hman tihin Lalramengi Ralte chuan Bethlehem Vengthlang chakna point a thawkchhuak a, a vaiin point ruk hmuin tum thum a hloh.
Bungkawn tan F-i’n point 22 hmu mah se tihsual a ngah a, point 16 a hloh. Rinpuii’n point 11 hlawhin vawi li chauh a tisual na a, inelna sangah team a nawr kal zo lo.
Pro Volleyball-a an insut hnuhnun vawi-thumah tum hnih Bethlehem Vengthlang an chak zawn mek a, a hmain Elisian-i tel loin set la loin Bungkawn lakah an tlawm ve thung.
June ni 8, Ningani chhun dar 1:30-ah Bethle-hem Vengthlangin tun season-a chetha Ka-nan an khelhpui leh dawn a; a tuk tlai dar 3:30 atangin Bungkawn leh Durtlang an inkhel ang.