Game khel hnem ber nih hnaih zel Ronaldo

Game khel hnem ber nih hnaih zel Ronaldo
Zirtawpni Saudi League inkhel pakhata Al-Nassr leh Al-Riyadh game kha a career-a Cristiano Ronaldo professional match 1,200-na chiah niin, mipa footballer zinga official match khel hnem ber Peter Shilton-a record a hnaih chho zel.
England goalkeeper hlui Shilton hi competitive men’s professional game khel tam bera chhinchhiah niin, a record erawh sawi dan pahnih a awm a, statistics website thenkhatah chuan a game khelh zat hi 1,390 tia dah niin, Shilton hi chuan X lama dahluttute hnenah 1,387 tiin a hrilh thung a, a sawi tlem zawk tlat!
Chutiang mi ropui bik a tluk zo dawn em la hriat theih loh Portuguese superstar hian a khelh mekna Al Nassr tana a inlan zanah goal khat thunin assist vawikhat a siamchhuak a, a club chu Al-Riyadh lakah 4-1 hnehna chanpuiin, inkhelh banah Saudi League chuan an X platform-ah Ronaldo mellung phun lawmpuina tarchhuakin, “Cristiano Ronaldo hian professional match 1,200 a khel tling ta,” tih an ziak.
Real Madrid player hlui hi tunah kum 38 mi ni tawh mah se goal thun a la harsat lo a, Zirtawpni zanah pawh darkar chanve an khelh tlin hnu lawkah Sadio Mane siamsak atangin goal hmahruai a khung a; Mane pawh hian an thah fel hnu lawkah goal a tilut ngei a, mahse, pawmsak a ni lo.
Portuguese Ronaldo hian season kal laia league match 16 a khelh tawh atanga goal 16 thun tling tawhin league top scorer a nih mekna a sawhnghet zel a; a hma kar chiah Zirtawpni khan hmahruaitu Al-Hilal lakah sithum faiin Al-Nassr an tlawm a, khami tuma goal khung zo lo Ronaldo chuan Al-Riyadh lakah goal khat thawhin a team a chakpui leh ta a ni.
Hnehna boruak an tem leh hnuah Ronaldo chuan social media kaltlangin point thum an sualchhuah leh tak thu a sawi a, a career-a match 1,200 a khelh tlin theihna kawngah a team-mate zawng zawng puihna avangin lawmthu a sawi nghal a; a thlen chin tawh pui a tih thu sawi chungin record ding lai tluk tura hmabak a la neih thu a sawi.
First-half injury time-ah Ronaldo hian a chipui Otavio goal tur a siamsak ve leh bawk.
Al-Nassr goal hnih dang hi Brazilian Talisca tihluh ve ve niin, Al-Riyadh goal neihchhun hi Andre Gray-a thun a ni thung.
Point 37 neiin Al-Nassr hian table-ah pahnihna an luah mek a, hmahruaitu Al-Hilal lakah point sarih zeta la hnufualin, point 16 nen Al-Riyadh hian 14-na an thut ve thung.