Meidum atanga natural gas lakchhuah dan tur relin ONGC hotute leh chief minister an inkawm a. Mizorama gas/oil irhchhuahna hria leh hmu chuan hrilh turin chief minister hian mipui a ngen.
Delhi atanga lokal Oil and Natural Gas Corporation Ltd (Exploration) director Sushma Rawat chuan Inrinni khan chief minister Lalduhoma hi a chenna inah a kawm a. Meiduma natural gas an hmuhchhuah tawh chu a lakchhuahna tur hmun tha, hmun hnih hmun thumah an thlang fel tawh tih hrilhin, heng hmuna an khawl lakluhna turin Chhimluangtê luiah Mizoram sawrkarin lei a dawh mek chu hna a muan avangin an duh hunah an tan thei loa, lei dawh hi hmanhmawh sak turin a ngen.
Mizoram hmun thenkhatah lei chhung atanga gas irhchhuak a awm thu an sawi dun a. Heng gas irhchhuahna (seepage) hi a rang lama tlawh chhuah a, zirchian nise, an ti.
Mizorama oil/ gas lakchhuah hunah Mizo thalai, geology lama thiamna nei tan hna a tam dawn hle tih Sushma Rawat hian sawiin, chief minister chuan Mizo thalaite geology zirna lam uar tura ngenin, a zirna hmun pawh a theih anga tih len dan sawrkarin a ngaihtuah tur thu a sawi a ni.
ONGC hian Mizo thalaiten geology lam zirna an uar deuh deuh theih nan a tul anga Mizoram sawrkar thawhpui an inhuam tih an sawi a. An sum leh pai senga zirlaite tana field trip buatsaih, zirlaite hnena training/interaction rawn pek leh Dehradun-a ONGC Institute-a practical exposure buatsaihsak pawh an inhuam tih an sawi. Hemi chungchanga indawr zui dan tur pawh an ruahman nghal a ni.
ONGC director-in chief minister a rawn hmuh chhan hi February 11-a Delhi-a chief minister leh Ministry of Petroleum & Natural Gas, Exploration Strategies and Production Policy director general (Hydocarbons) Dr Pallavi Jain Govil nen an inkawmna kal zel a ni.
-- Advertisement --
Chief minister Lalduhoma chuan Mizorama gas/oil irhchhuahna hria apiangin a awmna khua, lirthei kal theih chin atanga a hlat zawng, a thalak emaw video tawi leh thil tul dang awmte ama social media kaltlangin emaw whatsapp number 8730970574 ah emaw email-ah cm@mizoram.gov.in ah thawn turin mipui a ngen.