Nimin khan Kolasib Sub Hqrs YMA, Awithangpa Group YMA, Khamrang branch YMA leh JAC hruaitute chuan national highway siamthat mek an endikna lamah, kawngpui kama eirawngbawlna gas phur truck pahniha gas tihchingpen lai an nangching a, thuneitute an hriattir a, dan anga hma lak chhunzawm nghal a ni a.
Eirawngbawlna gas tihchingpen a hluar avangin tunhma atang tawhin Legal Metrology leh Central YMA te pawhin ngawrh takin hma an lo la tawh thin a, gas tihchingpen hmangte pawh engemawzat an man a, dan anga action lak chhunzawm pawh a ni thin.
Gas buk tling lo chungchangah, gas agent te pawh fimkhur tura hrilhin, dan angin gas semnaah gas bukna tur spring balance an keng tel zel tur a ni, tiin thuneitute pawhin an hrilh thlap a, mahse hei hian tun thleng hian zawm a la hlawh lo hle.
Engatinge gas bukna spring balance keng lova gas semtuten gas an la sem reng theih si? A chhanna chu – mipui (customers) te hian kan dikna leh chanvo humhalh nachang kan hriat tawk loh vang leh dan anga thil tih kan peih loh vang a ni pakhat awm e. Customer te hian buk thlap thlap loh chuan gas hi la duh ta miah lo se, gas semtute hian a bukna tur an keng thlap thlapin a rinawm.
Mipui lamin spring balance an phut (demand) bawk si loh avangin gas buk tling lo deuh a lo awm pawhin Gas Agent lam chuan an sem thei zel si a. Chutih rual chuan, gas phurtuten gas buk tling lo an phurh pawhin Gas Agent lamah harsatna an nei em em lo tih an hre ve kar bawk a, kawng laka gas tihchingpen chu hlawk an ti ta riau thin a ni ber awm e.
Chumi awmzia chu, gas phurtute gas phurh hi a buk a tlin leh tlin loh uluk taka lo endik a ni lo thin tihna a ni thei ang.
Mipui lam hian dan hi ngai pawimawh hmasa ila, gas buk tling leh tling lo hi endik thlap thlap peih zel ila, Gas Agent-te pawhin gas phurtute gas phurh uluk zawkin an lo endik phah ang a, gas phurtute hian kawnglaka gas tihchingpen hi hlawkthlak an ti reng hauh lovang le.
Gas tihchingpen ngam a la ni reng hi…
Get real time updates directly on you device, subscribe now.
Next Post