Singles lamah title hlawhchhuak zo lo mah se Coco Gauff leh Katerina Siniakova tangdun chuan kutbengin Roland Garros an chhuahsan ta chuang lo a, an pahnih thawkduna a vawikhatna atan French Open women’s doubles title an hlawhchhuak.
American mihang player Gauff hi chuan Jessica Pegula nen tangdunin 2022 French Open women’s doubles final a lo khel zak zak tawh a, kuminah Czech nula Siniakova nen hlawhtlinna an chang ve ta nge nge a, final-a an khingpui Italian pair Jasmine Paolini leh Sara Errani laka 7-6 (7-5) 6-3 hnehna changin French Open women’s doubles champion an ni.
Kum 20 mi Gauff tan tun kha major doubles title a lak vawikhatna a nih laiin a Czech partner tan erawh women’s Grand Slam doubles title vawiriat a sualchhuahna leh Paris bika a vawithumna a ni tawh.
Tarlan tawh angin, Gauff leh Siniakov a hi grand slam tournament-a an vawikhat inkawpna niin, kumin pawh hian hliam avangin tournament dawnah a kawppui thin Jessica Pegula inhnukdawk lo se la chuan a chipuinu nen bawk hian Roland Garros-ah an inlan leh a rinawm a, mahse, Pegula a remchan tak lohah chuan major doubles title hawn kawnga mikhual lo zet Siniakova nen chawpchilh takin an thawhdun theih phah ta a ni.
Hnehna an chan hnuah US Open singles champion Gauff chuan an tandun avangin Katerina lakah lawmthu a sawi ta chiah reng a, tournament tan hma ni hnih chiah awm tawhah inkawp turin thutlukna an siam fel tih sawi chungin, “Last minute tak tak kha a ni a, double khel lo turin ka lo inngai hman tawh a, min sawm hlauh kha ka lawm tazet a ni,” a ti.
Inrinni women’s singles final-a world number one Iga Swiatek hneh zo lo Paolini tan erawh ni hnih chhunga tum hnih ngawt Grand Slam final-a a tlawmna niin, Paris khuaah hming chher viau mah se a hmawrbawkna erawhin duhthu a sam ta lo a ni.
Inrinni vek khan Marcelo Arevalo leh Mate Pavic tangdun chuan final-a an tumpui Simone Bolelli leh Andrea Vavassori laka 7-5 6-3 hnehna changin men’s doubles trophy an chawi ve bawk.
Gauff leh Siniakova kutah French Open doubles title
Get real time updates directly on you device, subscribe now.
Prev Post