Gaza a Al-Shifa damdawi in-ah ruang 179 phum tawh

Gaza damdawi lian ber huam chhungah mi 179 phum an ni tawh a, heng zingah hian nausente pawh an tel tiin Al Shifa Hospital chief Mohammad Abu Salmiyah chuan a sawi a.
“Loh theih lohin a huhova ruang te phum lo thei lovin min siam a ni,” tiin hospital director chuan a sawi a. Hospital-in fuel a neih tawh loh hnuah nausen pasarih leh damlo 29 intensive care unit a mi te pawh thiin phum zui an ni tiin a sawi bawk a.
“Heng ruangte hi hospital complex-ah a awm khawm a, electricity pawh kan nei tawh lo,” tiin a sawi bawk.
Ruang tawih rim chuan a hneh hle tawh tia sawi ni bawkin damdawi ina thawk surgeon Doctors Without Borders mi leh sa chuan thil thleng mek chu ‘mihring lo’ tiin a sawi a.
“Electricity pawh kan nei lo va, damdawi Inah tui pawh kan nei lo va, eitur pawh kan nei lo,” tiin a sawi bawk a.
Al Shifa Hospital hi Gaza City a damdawi in lian ber niin darkar 72 chuang tlawh pawh theih loha siamin a awm tawh a, a luhna hma lamah Israel in tank dah tlat bawkin Tel Aviv chuan he damdawi in hi Hamas tena underground headquarter an neihna tunnel luhna leh chu mi chunga sak chu a ni an ti thung.
Israel chuan Hamas te chu damdawi in leh dam lote chu inphen nana hmangah puhin hei hi Hamas leh Gaza health officials te chuan an pha ve thung a.
United Nations chuan damdawi in chhungah hian damlo, staff leh civilian inhumhimna zawnga tlan lutte nen vek mi 10,000 vel lai a nawmah a ngai a. A bul hnaiah inbeihna nasa tak a thlen bawk si avangin khawiahmah an chhuak thei lo tih a ni bawk.
Damdawi in, medical personnel te chu international humanitarian law-in a hum tlatte an ni a. Inphen nana hman a rem lo va, operation eng pawh awm se dam lo, staff leh civilian te chu humhimin an awm tur a ni, tiin United Nations’ Office for Coordination of Humanitarian Affairs chuan a sawi.
US leh UK bakah ram thahnem tak te chuan 7 October a Hamas tena Israel an beih hnuah Israel an thlawp tlat thu an sawi a.
Israel-in a beihletnaah pawh an thlawp zui zel a. Mahse, tun hnaiah erawh Israel chu Palestinian hospital leh civilian te nasa zawka humhim an nih theih nana hma la turin an nawr tawh thung.
Joe Biden pawhin Al-Shifa damdawi in chu humhim ni se a duh thu a sawi chhuak tawh a. UK prime minister Sunak pawhin Gaza-ah civilian nunna chan an tam lutuk tia sawiin indona chu chawlh lailawk tal siam ni se a ti bawk.