Gaza-a in la dingte ruah vanga chim thei dinhmunah ding

Gaza-a in la dingte ruah vanga chim thei dinhmunah ding
Gaza-a thuneitute chuan indona avanga in la ding rawih tawh tak takte chu tun hnaiah Palestinian-te chenna hmuna ruah tam tak sur avangin chim thut thei reng a nih thu an sawi a, ruang zawn hna pawh a khirh sawt tih an sawi.
Zirtawpni khan Gaza-ah hian in pahnih a chim a, mi 12 vel an thi niin tual chhung damdawi in thuneituten an sawi a. Tui lianin puan in chimin a la nuam bawk.
Israel leh Hamas hian kum hnih chhung indona a kal hnuah October khan inkahhai an puang a; mahse, Palestinian puitu pawlte chuan Gaza-ah puihna a la lut tlem reng tih an sawi a, mi cheng zawng zawng deuhthaw in nei lo an nih thu an sawi.
Gaza Civil Defence thupuangtu, Mahmoud Basal chuan ram dang leh tanpuitu pawlte chu Palestinian baihvai tak takte tan puan in an pek aiah mobile home leh caravan ngaihtuahsak zawk turin a ngen.
Thawhtanni khan UN Palestinian refugee agency hotu chuan Gaza-ah engmah tikhawtlai lovin dinhmun chhe taka awmte tan puihna thawn luh thuai thuai theih a tul tak zet thu a sawi.
“Storm Byron-in ruah leh khaw vawt tak a thlen a, Gaza Strip-a chengte hi khaw vawtin a hmet hlum mek a ni,” tiin UNRWA Commissioner-General Philippe Lazzarini chuan X-ah a tar lang.
“Tui tlingin an awmna rawih tawh tak takte a tichim mek a, hei hian khaw vawt an tuar mek a tizual a ni,” a ti.
Lazzarini-a hian Gaza-a phurh luh tur bungruate chu thla tam tak luhpui turin an nghak tih a sawi a, heng bungraw tangte hian mi maktaduai hnih chuang zinga sang tel mamawh a phuhru thei dawn niin a sawi.
UN leh Palestinian thuneitute chuan baihvaia awm mi maktaduai 1.5 vel tan hmanhmawh takin puanin 3,00,000 vel tal an mamawh rum rum thu an sawi a. Tuna khawsak nana an hman chu puan in chhe tak tak leh plastic pan chia khawr pum mai mai a nih hlawm thu an sawi.
Hetih lai hian Gaza thuneitute chuan indo laia Israel-in a beih laia thi mi 9,000 vel ruang hai chhuah tumin in chim karah hna an la thawk reng bawk a; mahse, khawl tha an neih tawk loh avangin an hna a sawt thei lo tih an thupuangtu, Ismail al-Thawabta-a chuan a sawi.
Thawhtanni khan chhanchhuah hna thawktute chuan December, 2023-a naupang 30 tela mi 60 vel awmna in chhawng sang kah chima thi nia an sawi ruang 20 vel an hai chhuak tih an sawi.
Hamas kaihhruai thuneitute hian inkahhai inremna an siam angin Israel-in puihna tam zawk luhtir an khap niin an sawi a. Tanpuitu pawlte pawhin Israel hian ni tin mamawh lut tur an dang niin an sawi ve bawk.
Israel erawh chuan an insawi ang ngeiin thil an ti a, puitu pawlte chuan semzai tawk lo va, Hamas-in bungraw lut an ru thin an veng hneh lo niin an puh let ve thung.