Gaza-a inkahhai hnuah puihna phur truck 10,000 chuang lut

Gaza-a inkahhai hnuah puihna phur truck 10,000 chuang lut
United Nations humanitarian chief chuan January 19 atanga Gaza Strip-a Israel leh Hamas inkahhai puan a nih hnuah tanpuina bungraw phur truck 10,000 chuang a luh tawh thu Ningani khan a sawi.
“Inkahhai puan a nih atanga chawlhkar hnih chhung hian truck 10,000 chuang luhtir a ni tawh a, a pung hle a ni,” tiin Tom Fletcher chuan X-ah a tar lang.
UN Under-Secretary-General for Humanitarian Affairs & Emergency Relief coordinator hian amah ngei pawh Gaza-ah hian puihna phur luttute ruala a kal ve thu a sawi bawk.
“Thil pawimawh tak tak, nunna chhanna tur ei tur te, damdawi te leh puan inte phurtu truck-te luh theihna tur siamtute zawng zawng chungah ka lawm tak zet a ni,” a ti.
Fletcher-a’n hetiang thu a sawi mek lai hian Israel leh Hamas chuan inkahhai an puan mekah a thawh hnihna atana inremna turin inbiakna an tan ve chiah a. Indona hi October 7, 2023-a Hamas-in Israel a beih atanga intan kha niin thla 15 hnuah an chawl rih chauh a ni.
Hamas chetnaah hian Israeli 1,210 thiin a tam ber hi civil mi an ni tih Israeli thuneituten an sawi tih AFP chuan a tar lang.
Israel hian hemi chhan let nan hian Hamas chenna, Gaza a bei zui nghal a, mi 47,518 vel thi tawhin a tam ber hi civil mi an nih thu an hnuaia health ministry chuan a sawi a. Hei hi UN pawhin a rintlak tawk tih a sawi.
Inkahhai puan a nih hma kha chuan Gaza-a puih ngai tak takte puihna tur a lut thei lo tluk a ni a, tanpuitu pawlte chuan Israeli-ten Gaza Strip an beih avang hian mi tam tak riltamin an awm a, tam a tla dawn niin an sawi thin.
Inkahhai puan a nih hnuah ei tur, tuialhthei, damdawi leh mamawh dangte chu Gaza-a phurh luh theih a ni ta a. Hmar lam atanga indona avanga chhim lam pante pawh an awm hmun pangngaia kir leh phalsak an ni bawk.
Gaza-a inkahhai inremna hi a thawh khatna niin ni 42 awh tur a ni a, hetih chhung hian Hamas hian Israel an beih tuma hren tura an hruai zinga mi 18 an chhuah a, Israel pawhin an lung ina an tantir Palestinian 600 vel an chhuah ve tawh bawk.