Gaza-a puihna semna hmunah mi 24 thah leh an ni
Gaza chhim lama Nasser damdawi in chuan tanpuina thil semna bulah mi 24 thah an ni tih a sawi.
A hmuna awm Palestinian-te chuan Inrinnia khan miin ei tur sem dawn tuma an intlar laiin Israeli sipaiten an kap niin an sawi bawk.
Israel Defense Forces (IDF) erawh chuan silai an hmeh puahah ‘tumah inhliam an awm lo’ tih an sawi thung.
Israeli sipai hotu pakhat chuan an tana hlauhawm ni thei hnawh kian nan tihthaih nan silai an kah ngei thu a sawi bawk.
An sawi dan hi finfiah theih a ni lo ve ve a, Israel hian Gaza-ah hian ram dang mi chanchinbu luh a phal lo.
Inrinni tlaia thlalak darhah erawh Nasser damdaiw in tualah hian ruang a awm nual a, nurse leh thisen kai hnenghnuang mi thenkhatin an awmpui tih a lang.
Video darh pakhatah chuan mipa pakhatin puihna sem lak tuma an nghah laiin minute nga chhung vel kah an ni tih a sawi a. Damdawi ina thawk pakhatin Israeli sipaite kah niin a sawi bawk.
Reuters news agency chuan thil thleng hmutu a biaknaah chuan mite hi an lu leh an tukhumah kah an ni tih a hrilh.
Gaza-ah hian tanpuina semna hmunah hian ni tin deuhthaw Israeli-te silai hmeh puaha thi an awm.
Israel hian March thla atang khan Gaza Strip-a puihna lut tur a dang vek a, thla hnih inkahhai an kalpui hnuah sipai chakna hmangin Hamas a bei zui leh bawk a. Palestinian hel pawl hi Israeli a hrente an chhuah theih nana na zawka nawr nan a ti niin a sawi.
Tam a tlak mai dawn avangin May atangin tlem a hawng tan a; mahse, ei tur leh thil dang a la vang hle.
Palestinian raltlan buaipuitu, Unrwa chuan kham ei tur hmu lo naupang sang tel awmin ni tin an hmuh belh zel tih an sawi.
UN puihna phur lorry tlem luh an phal bak Israel leh US chuan puihna sem dan thar, Gaza Humanitarian Foundation (GHF)-in an buaipui an siam a, hei hi Hamas-ten puihna an ruk loh nana ti niin an insawi.
Zirtawpni khan UN human rights office chuan puihna dawn tumnaa thah mi 798 an awm tawh thu leh heng zinga 615 hi GHF huam chhunga thleng niin an sawi.
Mi dang 183 hi UN leh puihna phur dang hmuna thah an ni thung.
Israel hian October 7, 2023-a Hamas-in an beiha mi 1,200 chuang an thah leh hren tura mi 251 an hruai phuba lak nan Gaza hi a bei tan a. Mi 57,823 vel thi an awm tawh.
Get real time updates directly on you device, subscribe now.