Gaza-ah ni 4 inkahhai, mi tang chhuah tawn dawn ta

Hamas militants tena October 7-a southern Israel bei thuta Israeli te mana an hren hnuah Qatar sorkar chuan White House be pawp nghal vatin ngenna : Adviser mi tlemte awmna team mi tangte chhanchhuah hna thawk tur din rawh u, a ti zui a.
Hamas tena mitang an man tukah US hmalaknain hna tan nghal niin lung in tang inthleng a awm theih nana hmalak zui char char niin Qatar leh Egypt te hmalakna kal zel chu Israel, Hamas leh United States te chuan an pawm thei ta a ni.
A ruka hmalaknaah hian US President Joe Biden chu mimal takin a inrawlh thuk em em a. Biden chuan emir of Qatar, Israeli Prime Minister Benjamin Netanyahu te chu a be pawp reng a ni.
Chu mai bakah inremna a awm theih nan Secretary of State Antony Blinken, CIA Director Bill Burns, national security adviser Jake Sullivan leh a deputy Jon Finer, bakah U.S. Middle East envoy Brett McGurk te pawhin darkar tam hun an hmang bawk.
Heng official tena theihtawp an chhuah avang hian Hamas ten an mi hren 50 chhuah zalen an remti a, chu mi rual chuan Israel pawhin Palestinian prisoner 150 chhuah an remti bawk a. Gaza indona pawh ni li chhunng inkaihaina neih a ni bawk ang.
October 7 thil thleng hnuah Qatar hmalakna chu US chuan zawm nghal vatin Sullivan chuan McGurk leh National Security Council official Josh Geltzer te chu team din turin a ti nghal a. Chungte chu US agency dangte hrilh miah lova kalpui a ni a, a chhan pawh Qatar leh Israel te chuan a ruk thei ang bera thil kalpui an duh vang a ni, tiin official te chuan an sawi.
McGurk hi diplomat bakah Middle East hrechiang a ni a, ni tin zing lamah prime minster of Qatar Mohammed bin Abdulrahman bin Jassim Al Thani nen phone a inbiakna an nei ziah a. Chumi hnuah Sullivan leh Biden chu thil awm dan ni tin a hrilhfiah zui a ni.
October 13 khan Biden chuan Americans chhungkua Hamas tena an man chhungte nen inbiakna an nei a. A hnu lawkah Biden chuan Netanyahu be turin tel Aviv a pan zui a ni. Chutah chuan mitang te chhanchhuah chu US-in a ngaih pawimawh a ni tiin Netanyahu a hrilh nghe nhge a.
October 23 khan White House hmalakna chuan rah tha chhuahin American mitang pahnih Natalie leh Judith Raanan te chu chhuah zalenin an awm a.
White House-a West Wing a Sullivan office-ah chuan McGruk, Sullivan leh Finer te chuan hmalakna nei zui zelin American pahnih chhuah zalen chuan Biden chu Qatar hmalakna hmanga team lian lo tak dinin mitang te chhanchhuahna a thlen theih beiseina a tisang zual a ni.
Nasa zawkin mitang chhanchhuah an nih theih nan hmalakna kalpui niin Burns chuan Mossad director David Barnea chu a be zing hle a.
Joe Biden chuan mitang tam ber te chhanchhuahna a thlen theih nan chuan Israel-a Palestine tang mek te nena inthleng a ni tih manin chu mi thlen theih nan hma a la zui ta zel a ni.
October 24-a Israel-in Gaza a ground offensive a neih dawn khan US chuan Hamas te chuan Israel in ground invasion a tikhawtlai a nih chuan hmeichhia leh naupangte a chhuah zalen thei tih chu Israel a hrilh a.
US official leh Israelis te chuan ground offensive chu tihkhawtlai tur nge tur loh an sawiho nasa hle. Israelis te chuan Hamas te thu leh hla chu a chiang tawk lo tia sawiin mitang te chu an dam nge dam lo tih finfiahna pawh a awm lo an ti a, Hamas-te chuan mitangte an la dam zia fifniahna a pe duh bik bawk si lo a ni.
Americans leh Israelis te chuan Hamas te chu rintlak tawk lovah ngaiin Israel-in Gazaa beih ruahmanna a siam te chu inremna a awm thut theihah tiin siam danglam a ni an ti bawk a.
Chutah Biden chuan kar thum chhung zet chu mitang chhanchhuah an nih theih nan a hma a la zui ta char char a. Hamas te chu mitang an neih te kimchang hrilh turin an ti ta a ni.
Hun a duh rei a, a hahthlak bawk a. Doha leh Cairo kaltlangin Gaza ah thu thawn zel a ni a, a kual thui lo thei bawk hek lo.
Biden chuan mitang chhuah an nih theih nan Qatari prime minister pawh a be nghe nghe a. Inremna siam niin a thawhkhatnaah hmeichhia leh naupangte chu chhuah zalen hmasak an ni ang a, Israel chuan Palestinian lung in tang te a chhuah ve bawk ang tih a ni.
Mahe Israel lam chuan Hamas te chuan hmeichhia leh naupang te chu a bo a bang awm lovin an chhuah tur a ni a ti ve tlat a, US-in a pawmpui bawk a, chu mi hnuah Qatar hnenah Hamas tena an man naupang leh hmeichhiate chu an la dam vek tih finfiahna phut a ni leh bawk.
Hamas-te chuan a thawhkhatnaah mi 50 chhuah chu a remtih thu sawiin mahse identifying criteria phut chu a hnawl thung a. November 9 khan Burns chuan Doha-ah Qatari leader leh Mossad hotu Barnea te nen sawihona an nei leh bawk.
Buaina ber chu Hamas te chuan an mitang an mankhawm te chu tute nge an nih a sawi duh tlat lo chu a ni.
Ni thum hnuah Biden chuan emir of Qtar Sheikh Tamim bin Hamad Al Thani chu biain Hamas tena an chhuah tur mi 50 chu an indentifying information an kum, mipa nge hmeichhia leh eng ram mi nge an nih an sawi tur a ni a, chumi tel lo chuan hmalak zui ngaihna a awm lo a ti a.
He mi hnu lawk hian Hamas te chuan mitang 50 te thawhkhatnaa an chhuah tur te chanchin kimchang chu a pechhuak ta a ni.
November 14-ah Biden chuan Netanyahu a be leh a, inremna an siam zui thei ta a ni. He mi ni vek hian McGurk chuan Israel-ah Netanyahu a hmu bawk a. Netanyahu chuan McGurk hneh ‘He ruahmanna hi tihhlawhtlin kan mamawh’ tia sawiin Biden chu emir of Qatar be turin a ngen zui bawk.
Gaza-ah communication chhut chah a nih avangin inbiakna neih zui hleih theih lohin a awm a. Neih zui a nih theih veleh Biden chu San Francisco-ah Asia-Pacific summit neiha a awm lai a ni. Biden chuan emir of Qatar chu nawr zuiin Hamas te chu nawr turin a ngen zui ta a ni.
November 18-ah McGurk chuan Doha-ah Qatari prime minister a hmu a. He mi hnu hian Mossad lam be lehin Burns chu a be zui leh a.
Inremna siama awm tain a thawhkhatnaah hmeichhia leh naupangte chhuah zalen an ni ang a, a hnu zelah pawh mitangte chu chhuah zalen an nih theih beisei a ni ta bawk.
A tukah Cairo-ah McGurk chuan Egypt intelligence chief Abbas Kamil a hmu a. Chutah chuan Gaza-a Hamas leader te chuan ruahmanna siam chu an pawm thu an tichiang ta a.
Thil pakhat chiah chiang lo la awm chu thawhkhatnaa mi 50 chhuah zalen an nih hnuah mitang dang te chu chhuah zalen zel tur an ni dawn em tih chu a ni.