Gaza-ah ni 60 inkahhai kalpui a ni dawn – President Trump
Gaza-ah ni 60 inkahhai kalpui a ni dawn – President Trump
Israel chuan Gaza-ah ni 60 inkahhai kalpuina tur chu ‘tulna avangin’ a pawm niin US President Donald Trump-a’n a sawi.
Rawtna awmah chuan inkahhai kalpui a nih chhung hian ‘kil hrang hrangah indo a tawp theih nan thawh a ni ang’ tih Trump-a hian Truth Social-ah a tar lang a, a kimchang erawh a sawi lo.
“Muanna a awm theih nana rim taka thawktu Qatari leh Egyptian-ten rawtna hnuhnung chu an thlen dawn a. Hamas chuan an pawm ngei ka beisei,” a ti.
Israel hian October 7, 2023-a an ram luta Hamas-in mi 1,200 chuang an thah leh hren tura mi 251 an hruai hnuah Gaza-ah sipai chakna hmangin beihpui an thlak zui a. Hemi hnu hian Gaza-ah mi 56,647 vel an thi tawh.
Hamas hian inkahhai rawtna leh kalpui dan tur hi an pawm em tih erawh he chanchin ziah lai hian a la chiang lo.
Trump-a’n inkahhai a puan hi kar leha Israeli Prime Minister Benjamin Netanyahu-a nen an inhmuh hma lawk a ni a, US president hian a thu puan chu ‘a chiang’ niin a sawi.
US president hian Thawhlehni khan Netanyahu-a hian Gaza-a indona hi tihtawp a duh nia a ngaih thu a lo sawi tawh a. “A duh tih ka hilh a che u, karlehah inremna a awm ang,” a ti.
Kar hmasaah khan Hamas hotu lian chuan Gaza-a inkahhai a awmna tur leh mi hren chhuahna turin palaiten rim takin an thawk a; mahse, Israel kutah a la tang niin a sawi.
Israel hian indona chu Hamas chhut chimih vek an nih hma loh kalpui a tum tih a lo sawi tawh thin a. Hamas hian inremna nghet neiha Gaza atanga Israeli-te an insuan chhuah vek an duh ve thung.
Gaza-ah hian Israeli 50 vel hren an la awm nia hriat niin an zinga 20 vel chu an la dam nia hriat a ni.
Trump-a’n inkahhai a awm dawn tih a puan hma lawk hian Israel chuan Gaza hmar lamah sipai an chet nasa dawn avangin mipui insaseng turin a ti a. Thawhtanni khan Gaza City-a tuipui kam cafe a beihnaah Palestinian 20 vel an thi bawk.
March thla khan thla hnih inkahhai an puan an lo titawp tawh a. He inkahhai hi January 19 atanga kalpui niin thawh thuma kalpui tura ruahman ni mah se thawh hmasa ber pawh an hmang tluan lo.