Gaza Board of Peace-a tel turin India-in Trump-a sawmna dawn

Gaza Board of Peace-a tel turin India-in Trump-a sawmna dawn
US President Donald Trump-a’n Gaza-a muanna a awm theih nana kal zel dan tur ngaihtuahtu tur a siam, Board of Peace an tiha member ni turin India pawhin sawmna a dawng ve niin a hretu pakhatin a sawi.
Trump-a hian Israel-in Gaza a beih tihtawp nana Hamas nen inkahhai an kalpui mek thawh hnihna bunga tel, board hi a siam a. He board hi indona avanga sawp chhe tawh tak Gaza tun din dan tur ngaihtuahtu tur niin sorkar, in leh lo tin din, sum thawh leh hmalakna dang dang ngaihtuahtu tur a ni.
“India chu President Trump-a’n Board of Peace for Gaza-a tel turin a sawm,” tiin a hretu pakhat hian a sawi a, a sawi chiang lem lo thung.
Hemi hma lawk hian Pakistan-a foreign office pawhin Prime Minister Shehbaz Sharif-a’n Trump-a hnen atangin Board of Peace-a tel tura sawmna a dawn thu a puang ve bawk.
Turkiye President Recep Tayyip Erdogan, Egyptian President Abdel Fattah el-Sisi, European Commission President Ursula von der Leyen leh France, Germany, ⁠Australia leh Canada hruaitute pawh board-a tel tura sawmna hi thawn an ni bawk.
Board of Peace din leh tel tura sawmna hi Trump-a’n Argentina President Javier Milei leh Paraguay President Santiago Pena a sawmna lehkha social media-a hruaitu pahnihten an dah chhuah atangin a darh tan a. Trump-a’n Milei-a a sawmnaah hian board hian ‘Middle East-a muanna a awm theih nan’ tih leh ‘khawvel buaina ching fela kawng thar zawh tan nan’ tih pawh ziah lan tel a ni.
Trump-a sorkarin ram 60 vel hnena board kal dan tur (charter) duan chhin an thawn chhuahah chuan board-ah hian kum thum chuang member an nih duh chuan $ tluklehdingawn 1 an thawh a ngai niin Reuters chuan a tar lang.
The Financial Times chanchinbu chuan charter-ah hian ‘Board of Peace hi khawvel huap pawl, a tuartu hmun leh innghirnghonain a tihbuaina hmun tihnghet, mahni kea dingtir leh, dan ang taka sorkar din leh muanna a awm theih nana thawh’ tih a inziak tih an tar lang.
Zirtawpni khan Trump-a chuan British prime minister hlui, Tony Blair-a chu a thuneitu pawl, executive member-ah Trump-a makpa, Jared Kushner, US Secretary of State Marco Rubio leh US special envoy to the Middle East Steve Witkoff leh World Bank Group President Ajay Banga te nen an ni dawn tih a sawi tawh bawk.
Blair-a hi kum 2003-a US-in Saddam Hussein-a mi thah puk theihna ralthuam a kawl tia Iraq a rûn thlawptua puh a nih avanga sawisel hlawh tak kha a ni a; mahse, a hnuah he puhna hi a dik lo tih finfiah a ni tawh.
Mi sawm tam tak zinga mi hi mi malin Palestinian mi thiamte pawh an telna, National Committee for the Administration of Gaza an tih enkawltu tur, Gaza executive board-a member an ni dawn bawk nia sawi a ni.