Gaza chungchang sawi turin Trump leh Netanyahu inbe hnai

Gaza chungchang sawi turin Trump leh Netanyahu inbe hnai
Israeli Prime Minister Benjamin Netanyahu-a chuan Gaza indona titawp tura US rawtna thawh hnihna kalpui hun a intan hnai a, sawiho ngai tam tak erawh a la awm tih sawi a awi a. Hmabak zingah ram dang tangrual sipai awmtir dan tur pawh a tel tih a sawi.
Netanyahu-a hian Jerusalem-a Pathiannia German Chancellor Friedrich Merz-a nen an inkawm hnua thuthar lakhawmtute hnenah thawh hnihna tihhlawhtlin dan tur sawi dun turin tun thla tawpah US President Donald Trump-a nen pawh an inhmuh dawn thu a sawi.
Prime minister pisa chuan November khan Trump-a’n Netanyahu-a hi White House ‘tlawh thuai turin’ a sawm thu a lo sawi tawh a, a hun tak erawh an sawi lo.
Netanyahu-a hian Trump-a nen hian Gaza-a Hamas rorelna tihtawp dan tur an sawi dun dawn tih a sawi a. Israel leh Hamas inkahhaiin thla hnihna a kal mek laiin lehlam lehlam hian bawhchhiaah an inpuh tawn nasa hle bawk.
Netanyahu-a chuan Hamas hian inkahhai an kalpui ringawt a tawk lo va, ‘an intiamna’ ang ngeiin ralthuam an daha Gaza chu sipai awm lohna hmuna siam tur a nih thu a sawi.
Israel hian Trump-a rawtna anga inkahhai kalpui mekah hian Gaza 53% an la thunun a, Gaza-a helhovin mi an hren chhuahin Israel-in Palestinian a mante a chhuah ve bawk.
October thla tira inkahhai kalpui a nih atangin Hamas hian Gaza hmun hrang hrangah intun din leh tumin hma an la mek zel bawk.
Ruahmanna awm saah chuan inkahhai thawh hnihnaah hian Israel chu thui zawk inhnuk kirin Gaza-a thuneitu thlak nan roreltu dah a ni ang a, venhimna kengkawh turin ram dang tangrual sipai dah an ni ang a, Hamas-in ralthuam tungin indona avanga chhiate siam that hna tan a ni ang.
Israel-ah multinational coordination centre din a ni bawk dawn a; mahse, he ruahmanna hi engtik atanga hman tan tur nge tih sawi a awm lo va, thuneitute chuan a tak thlentir tuma hma lak mek a ni tih erawh an sawi.
Merz-a chuan Germany pawhin Gaza tun din lehna tura puih a inhuam thu a sawi a; mahse, Netanyahu-a leh Trump-a inbiak nghah phawt an tum a. Washington pawh hemi atan hian a inbuatsaih mek nia sawi a ni.
Israel hian inkahhai puan a nih hnuah helho tawmna leh an hmuhma a la bei chhunzawm reng a. Gaza-a health ministry chuan inkahhai hnuah Palestinian 373 thah an ni tawh tih an sawi a, Israeli sipai pathum thah an ni tawh bawk.