Gaza-in puihna a mamawh ang tlem chauh a la dawng – WHO
World Health Organization (WHO) chuan Gaza chuan ‘a mamawh ang tlem chauh’ puihna a la hmu nia sawiin health agency hian an rama damdawia inenkawlna tun din tumin hma a la mek tih a sawi.
WHO chief Tedros Adhanom Ghebreyesus-a chuan mihring chengte puihna chu a luh belh hret hret tih a sawi a, Gaza-a damdawia inenkawlna hmunhma leh mamawh titha leh tur hian $ tluklehdingawn 7 vel a ngai dawn niin a sawi.
Kum hnih chhung Israel-Hamas indo chu tunah hian US rawtna angin inkahhai kalpui mek a ni a. Palestinian-a damdawi thuneitute chuan Gaza Strip-ah hian indonaa thi mi 67,000 chuang an awm thu leh thi zinga hmun thuma thena hmun khat dawn hi kum 18 hnuai lam niin an sawi bawk.
Tedros-a chuan tanpuina phurh luh mai theih tur tam tak an tan mekna, Gaza leh Egypt inluhpawhna pui ber, Rafah border crossing chu hawng thuai turin a ngen bawk.
Rafah inluhpawhna hi Israel chuan thununin May, 2024 atang khan a khar a, hei hi puihna luhna pui ber a nih avangin hmun dang atanga lutin kham a la daih thei lo va. March thlaa inkahhai kalpui chhung khan damlo pali tling lo deuhvin Gaza hi an chhuahsan a, hei hi tunah chuan a la phak lo hle a ni.
WHO chuan inkahhai kalpui mekah hian Gaza-a ei tur awm dinhmun chu a ziaawm hret tih an sawi a, manganna tak tak erawh phuhru tur chuan mamawhna a la sang hle tih a sawi a, mi 6,00,000 chuangin ei tur hi mamawh tak zetin an la mamawh niin a sawi.
Health agency hian puihna sum pek chhuah tur an hmuh thin ang an dawn that loh avangin kum tharah hian thil a manganthlak tih a sawi a, thihna an dan ngei tura ngaih maktaduai 14 chuang chu sum awm lo avang hian an dan theih loh phah thei dawn niin a sawi.
US chuan kumin kum tirah khan WHO hi a chhuahsan a, COVID-19 hripui leng leh khawvel huap hriselna thil a hmachhawn dan a dik loh vangah a puh.
Sum thawhtu pui berin an chhuahsan avang hian WHO hian 2026-27-a sum hman tur an ruahman chu dollar tluklehdingawn telin a phak dawn lo va, sum hman tura an ruahman 21% vel chu an paih then a ngaih phah dawn a ni.