Medical journal lar, The Lancet-in Zirtawpnia zir chianna a tihchhuahah chuan Israel leh Hamas indona kal mekah a tir lam thla kaw chhunga Gaza-a thi awm zat chu Palestinian awp chin rama health ministry-in a chhinchhiah aiin 40% vel zetin a tam zawk tih tar lan a ni.
October 7, 2023-a Palestinian hel pawlin a beih avanga Israel-in phuba lak nana Gaza-a Hamas-te rûn mekah hian thi zat hi inhnialna siamtu lian tak a ni mek zel.
Nikum June 30 khan Gaza-a Hamas enkawl health ministry chuan indonaa thi zat hi 37,877 an ni tiin a tar lang.
Hetih lai hian ministry-in ngun zawka zir chiangin online survey leh social media-a sunna thu tihchhuah hrang hrangte nen khaikhinin Israel-in Gaza a rûn tirh atanga thla kaw chhunga thi chu 55,298 atanga 78,525 inkar a ni tih an sawi a ni.
Zirchiannain thi zat ni tura a rin ber chu 64,260 a ni a, hei hi a dik a nih chuan health ministry-in a chhinchhiah aiin 41% zetin a tam zawk dawn tihna a ni. Thi zat hi indona chhuah hmaa Gaza-a mihring cheng 2.9% an tling dawn a, ‘mi cheng 35 zinga pakhat zel an ni’ tiin zirchiannaah hian tar lan a ni.
UK kaihhruaia zirchiangtute hian thi zinga 59% chu hmeichhia, naupang leh upa an nih a rinawm tih an sawi bawk.
Thi zat an sawi hi hliam tuar thi chauh an ni a, hrisel lohna leh ei leh in tur tlakchham avanga thi chhiar tel an ni lo va, hei bakah hian chin hriat lohva awm leh in leh thil chimin a delh, an ruang hmuh lohte chhiar tel an ni lo bawk.
Ningani khan Gaza-a health ministry erawh chuan thla 15 chhung indo tawha thi zat chu mi 46,006 nia an chhinchhiah thu an puang.
Israel-ah ve thung chuan kum 2023-a Hamas-in an beihnaah khan mi 1,208 an thi a, a tam ber hi civil mi an ni tih an sawi tih AFP chuan a tar lang.
Gaza indonaa thi chhiar pung nasa
Get real time updates directly on you device, subscribe now.
Prev Post
Next Post