Geneva-ah US leh Iran inbe leh

Geneva-ah US leh Iran inbe leh
US leh Iran thuneitute chu Geneva-ah inhmukhawmin a vawi thum nan buaina chhuak thei ven nan an inbe leh a, President Donald Trump-a chuan nuclear inremna siam a nih loh chuan Iran hi beih tumin a vau.
Sawihona hi kum 2003-a US kaihhruaia Iraq beih hnua Middle East-a US sipai punkhawm tam ber laia neih a ni a, Iran chuan an beih chuan tharuma chhan let a tum ve bawk.
Ningani khan zinga darkar thum inbiakna an chawlhsan hnuah tlaiah inbiak chhunzawm leh a ni a, inremna siam a ni dawn em tih a la chiang lo.
Oman Foreign Minister Badr Albusaidi chuan palai hna a thawk a, inbiate hian ‘awmze nei leh thil tha tak tak’ an inhrilh tawn tih a lo sawi tawh a, tun tumah hian ‘hmasawnna tam zawk’ neih an inbeisei thu a sawi bawk.
Trump-a hian buaina hi indawrna hmanga chin fel a duh zawk thu a sawi rualin Iranian hruaituten inremna an pawm theih nana nawr nan tiamchin neia kah pawh a ngaihtuah thu a sawi bawk.
President hian inbiaknaah eng nge a phut tih leh Iran nuclear hmunhma a kah atanga thla riat a liam hnuah sipai lama hmalak a ngaih theih chhan a sawi fiah lo.
Iran chuan US-in uranium a tihchak tihtawp tura a phut chu a hnawl a; mahse, a nuclear programme chungchangah hian a phut ang eng emaw zat tihsak a inpeih tih a lo sawi tawh thung.
Tun thla tir lama sawiho vawi hnih ang bawkin Iran palaite hi Foreign Minister Abbas Araghchi-a kaihhruai a ni a, US aiawhin special envoy Steve Witkoff leh Trump-a makpa, Jared Kushner te an tel bawk.
Tun hnai kar eng emaw zat chhung khan US hian Iran chhevelah hian sipai tam tak leh Trump-a’n ‘armada’ tia a sawi, aircraft carrier pahnih bakah indo lawng dangte leh indo thlawhna leh tuialhtheih inpekna thlawhna te pawh a tir tel.
Trump-a hian thla hmasa khan Iran-a bomb thlak turin a vau tan a, venhim hna thawktuten sorkar laka lungawi lohna lantirtute tharuma a tih letnaa mi sang tam takin an thih avanga vau a ni a. A hnuah Iran nuclear programme lam a hawi a, hei hi khawthlang ramte nena hun rei tak chhung an inhnialna lairil ber a ni nghe nghe.
Kum tam tak chhung chu US leh Israel chuan Iran hi a ruka nuclear ralthuam siam tumah an lo puh tawh a. Tehran chuan an programme hi a muanawm zawnga kalpui chauh a nih thu a sawi a, hetih lai hian an ram hi nuclear ralthuam nei lo zingah chuan ralthuama siam theihna tur chin hnaih taka uranium tichak awmchhun a ni.
Thawhlehnia Congress-a State of the Union-a thu a sawinaah Trump-a hian Iran nena an inkar boruak tha lo chungchang chu tawi leh chiang lo takin a sawi a, beih tumna a sawi chiang lo.
Iran chuan US thleng thei tur missile siam tumin hma a la mek tih a sawi a, a chipchiarin a sawi lo va. Nikuma beihpui thlak a nih hnua nuclear ralthuam program ‘tan thar leh vek’ tumah a puh a, ‘khawvela firfiak sponsor number 1… nuclear ralthuam neih a phal loh’ thu a sawi bawk.
US hian nikum June thla khan Iran-a nuclear hmunhma pathum a kap a, Israel nen beihpui an thlak zui a. Trump-a chuan heng hmunte hi ‘tihboral’ a nih thu a sawi.
Iran chuan International Atomic Energy Agency (IAEA)-a inspector-te chu hmun chhiate hi luh phalsak lo mah se beihpui thlak a nih hnuah uraniaum tihchak a tawp niin a sawi.
Trump-a chuan, “Deal siam an duh a; mahse, ‘nuclear ralthuam kan nei ngai lo vang’ tih kan la hre lo,” a ti.
Hetih lai hian a thu sawi hma darkar eng emaw zat khan Iran foreign minister chuan social media-ah Iran chuan ‘eng dinhmunah pawh nuclear ralthuam a siam ngai lo vang’ tiin a tar lang a. Araghchi-a chuan, ‘a hmaa a la awm ngai lo, inremna siamin inngaihsak tawnnate ngaihtuah a, inhmangaih tawnnate tihhlawhtlinna tur a awm’ a ti bawk.