George Strait-a’n CMA Lifetime Achievement Award dawng

George Strait-a’n CMA Lifetime Achievement Award dawng
2024 CMA Awards an semah country legend George Strait chuan Willie Nelson Lifetime Achievement Award a dawng a, a lawmthu sawinaah a nupui leh a tu leh fate hming lam chhuakin, “Ka chhungte, zanina helai hmuna min rawn telpui vektute chungah lawmthu ka sawi e. Ka nupui Norma, ka fapa Bubba leh a nupui Tamara leh ka tute Harvey leh Jillian te. A bik takin Norma, kum 53 dawn min lo tawiawm tawh tu- kum 53 hlimawm tak a ni e,” a ti.
Billboard Hot Country Songs chart-a No.1 kai thei hla 44 zet a nei tawh a, George Strait hi country music khawvelah a huhang a lian lo thei lo. A puala hun hmannaah 2024 CMA co-host Lainey Wilson chu che chhuak hmasa berin ‘Amarillo by Morning,’ tih hla 1983-a Strait hla hit a sa a, a dawta Jamey Johnson-a’n 2006-a Strait hit single ‘Give It Away,’ sa ve lehin, Miranda Lambert leh Parker McCollum ten 2008-a Strait hla hit ‘Troubadour’ an sa ve leh a, amah George Strait pawh a awm awl bik lo, Chris Stapleton nen ‘Honky Tonk Hall of Fame’ tih hla an sa dun ve leh bawk.