Germany an chak lo

Manager thar Julian Nagelsmann hnuaiah an mualah ngei a vawi khat nan an chak loh hnuin Germany an buai chhunzawm a, Thawhleh zana an khingpui Austria lakah si hnih faiin an tlawm.
Germany hi International friendly ah Austria hmachhawn turin Ernst-Happel-Stadion ah an leng lut a, mikhual an nihna hmunah si hnihin an tlawm. Mualneitu Austria tan hian minute 29 naah Marcel Sabitzer chuan hmahruaina goal a thun. Sabitzers goal thun hi Germany in an sut thei lo va, si khat faia hnufual chungin chawlhlawk an hmang.
Chawlhlawk hnu lamah Germany in an si phurh sut tum viau mah se an chesual thuai a, minute 49 na lekah Leroy Sane hnawhchhuah a ni. Bayern Munich leh Germany forward Sane hi Austria defender Phillipp Mwene lakah hlauhawm taka a chet vangin hnawhchhuah a ni a, professional football a khelh chhungin a vawi khat nan red card a hmu.
Si phur zawk leh kim lo zawk an nih vangin Germany tan chet a harsa leh zual a, goal an chhuah belh leh. Minute 73 naah Christoph Baumgartner chuan Austria goal hnihna a thun a, an hmahruaina a ti zau. Insiam?ha tura chak mamawh Germany hian hun tawp thlengin an si phurh an sut thei lova, an tlawm leh ta a ni.
Euro 2024 thlengtu tur Germany hian September thla khan Hansi Flick an ban a. Beiseina sang tak nen Bayern Munich manager hlui Julian Nagelsmann an la lut. Nagelsmann hnuaia an khelh hmasak berah USA an hneh nghal a, an phur hle. USA an hneh hnuin an zuih a, Mexico nen an inhnehtawk. Mexico nen an inhnehtawk hnu hian an mualah ngei Turkey hneh lovin an tlawm a. Turkey laka an mualpho hnuin Austria lakah an tlawm zui leh bawk.
Football ram ropui Germany hi an tualzawla khelh tur Euro 2024 ah champion an tum hle. Inelna lianah champion an duh vangin manager an thlak a, Flick aia an duh Nagelsmann lakah beisei ang hmasawnna an hmu thei rih lo a. Nagelsmann lakah dawh theihna an lantir dawn nge, a ?ha dang an zawng leh zawk dawn tih a chiang ta rih lo.