Germany hmaa ding turin Spain an tlang

Euro 2024 khelh meka team hmuhnawm, player nei tha leh champion tura rinkai tak Spain chuan Pathianni zan khan Georgia an hmachhawn. Point 9 hmu chunga last lut Spain hian Euro a hmel thar Georgia lakah si phur hmasa bawk mah se 4-1 in hnehna an chang let a, phu taka hnehna changin quarter final an lut.
Spain leh Georgia te hi Cologne Stadium-ah an inhmachhawn a, inkhel hmu-hnawm an lantir. Pressure in a delh rih ve loh, nuamti leh engthawl taka inlan Georgia in inkhel hmuhnawm an lantir leh a, beisei phak baka thain champion tura rinkai Spain an hmachhawn. Portugal an hneh vanga last 16 lut nawlh Georgia hian Spain an hlau bik lova, huaisen taka inlan in, goal thun hmasa zawkah an tang nghe nghe. Inkhel tan atanga minute 18-na lekah Spain centre-back Robin Le Normand chuan an lamah a dang goal a, Georgia hmahruaina goal a thunsak. He goal hi Spain in Eurp 2024 a goal an chhuah hmasak ber a ni.
Team lian lakah Georgia in goal an thun hmasa hi inkhel tihmuhnawmtu a ni a, an si phurh sut tuma tan tawh Spain nawr let a hmuhnawm thei hle. Ball chang tam zawk leh hlauhawm siam tam zawk ni mah se Spain in an si phurh an sut hma thei bik lo. Euro 2024 khel zingah Fifa ranking a hniam ber Georgia tan Euro-a vawi thum champion tawh Spain dan beh reng thei a ni lova, goal an chhuah ta nge nge. Spain game khaidingtu pawimawh tak Rodri chuan minute 39-naah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Spain an khel tha chhunzawm a, goal an thun leh thuai. Minute 51-na lekah rawlthar duhawm Lamine Yamal siamsak atangin Fabián Ruiz chuan hma an hruai letna goal a thun. Hma an hruai let hnuin Spain an khel tha chhunzawm a, Georgia tan dan theih an ni meuh tawh lo.
La Roja tan hian inelna neih meka khel tha tak Nico Williams chuan minute 75-naah an goal thumna thunin an hmahruaina a tizau. Si hnih laia hmahruai tawh Spain tan hian bench atanga lut Dani Olmo chuan minute 83-naah an goal lina thunin a tawp a khar a. Georgia lakah 4-1 a hnehna changin quarter-final an inhlangkai. Champion tura rinkai Spain hian inelna thlengtu leh champion tura rinkai zinga mi Germany an hmachhawn zui leh dawn a. An mahni ang tho a euro ah vawi thum champion Germany nen hian zirtawp zan dar 9:30 khian Stuttgart Arena-ah semi-final luh an inchuh ang.
Quarter-final lut zo ta lo mah se last 16 an lut ringawt pawh hi Georgia tan inchhuahna tham a ni. Euro an khelh hmasak berah Euro khel zinga ranking-a hniam ber ni chungin last 16 an lut thei hi rin phak baka hmasawnna leh chetthatna a ni a, an hma lam hun atan beiseina thar an nei ngei ang.