Ghana tana goal khung hnem ber Gyan chawl ve ta

Kum 37 mi niin Ghana record goalscorer Asamoah Gyan chuan football khelh a chawlh-san thu tunhnai khan mittui nen puangin, a jersey leh boot dahbo hlen tura thutlukna siam chu a khirh hle tih a sawi.
Kum 20 a inkhelh chhungin Gyan hian ram tan game 109-ah goal 51 a tilut tling a; kum 2010 khan BBC African Footballer of the Year atan thlan a ni.
Rawlthar kum 17 mi lek ni chungin kum 2003 khan a international debut a nghak-chhuak a, World Cup qualifier-a Somalia an tum tumin substitute a ni a; Black Stars tana a inlan hnuhnunber chu kum 2019 kha a ni thung.
Africa Cup of Nations tournament vawi sarih khelin, kum 2008 khan Ghana chu pathumna a nihpui a, champion zo lo tawk chiah zelin kum 2010 leh 2015 khan Africa khawmualpui ramte intihsiakna lianah hian runners-up a nihpui bawk.
An ram tana goal khung hnem ber a nih bakah World Cup-a African goal thun hnem ber ni nghalin, goal ruk a neih zinga a hmasaber phei chu Germany ram 2006 tournament group game-a sihnih faia Czech Republic an hneh tuma tan atanga second 68-na leka a thun kha a ni.
South Africa rama 2010 World Cup-ah khan goal thum thawhin Ghana chu quarter-final a thlenpui a, mahse, last eight-ah hian extra time tawp dawnah penalty a thelh avangin Ghana chu African ram zinga World Cup semi-final lut hmasaber an nih loh phah!
Kha penalty boruak kha kan la mitthla theiin a rinawm a, Uruguay striker Luis Suarez khan goalline-a ding chungin an tlawmna goal ni thei tur kha a kutin a dang a, red card hmuin penalty chawi zui bawk mah se a penalty chawi chu Gyan khan goal-ah a chantir zo lo a, South American team-in last four an luh phah a, a man petu chu Suarez a ni!
Brazil rama 2014 World Cup-ah khan Germany leh Portugal lakah Gyan hian goal khat ve ve thun lehin, kum 2019 khan international football a chawlhsan a, nikum Qatar ram World Cup khelh hma lawk khan rawn comeback leh zuai mah se a hlawhtling zo tawh lo.
Kum 2020-a Ghana pana a kir hma khan ram hrang hrang pariatah club 11 thuam a inbel hman a; a club zawm tawh zingah Udinese (Italy), Rennes (France) leh Sunderland (England) telin, Abu Dhabi, China Turkey leh India-ah a kual tawh bawk.