GHF-in an hnathawk pariat thatah Hamas puh

GHF-in an hnathawk pariat thatah Hamas puh
Israel leh US ten an thlawp Gaza-a puihna thil semtu pawl chuan Hamas-in an hnuaia thawk Palestinian-te phurtu bus an beihnaah mi pariat vel an that tih an sawi.
Gaza Humanitarian Foundation (GHF) hian beihna hi Nilaini zana thleng a nih thu leh bus hian thawktu 24 chuang a phur a, Gaza chhim lama distribution centre pana kal an nih thu an sawi a. A hmain Hamas hian an lo vau tawh niin an sawi bawk.
Hetih lai hian Gaza-a Hamas hnuaia health ministry chuan darkar 24 liam ta chhungin Palestinian 103 thah an ni a, 400 chuangin hliam an tuar bawk niin an sawi.
Heng zingah hian ministry-in Thawhlehni tuka puihna semna hmun bula mi 21 thah pawh an tel.
GHF hian a hmaa United Nations (UN) leh puitu pawl dangten Gaza-a tanpuina an sem thin thlakin May 26 atangin hna an thawk tan a. Hemi hnuah hian an hnathawhna chhehvelah tharum thawhna leh thil sawi hlawh tak tak a thleng tam tawh hle a, puihna an semna hmun velah inthahna ni tin a thleng.
UN chuan GHF hi an thawhpui duh lo va, tanpuitu pawl dangte pawhin an thil kalpui dan chu mihring inenkawlna kalhmang lo va, a khingbai a, anmahnia ti thei anga insawiah an puh.
GHF chuan a hma ni lamah khan Hamas atangin vauna an dawng nia sawiin an hnathawk thenkhat chu ‘hren tura hruai’ an nih an hlau tih an sawi.
Israeli sipaite chuan engmah an la sawi lo va; mahse, GHF thuchhuahah, “Hamas hian puihna sem hna hi an thunun lo vang a, an tibuai dawn lo bawk,” an ti.
An director lailawk, John Acree chuan Ningani khan an centre-te chu an khar rih dawn tih a sawi hman a; mahse, an la hawng zui zel rih.
“Hamas-in dawihzep taka mi an thahna chhan letna tha ber chu keimahnia innghat, Gaza-a chengte ei tur pek zel hi a ni tih thutlukna kan siam,” a ti.
Inrinni khan GHF hian Gaza-a ‘hna an thawh theih loh nan’ Hamas-in an vau niin an lo sawi tawh a. Hamas erawh chuan phain GHF beihpui thlak dan chu ‘kawng tinrenga hlawhchham’ niin a sawi.
GHF-in puihna a semte hi kham khawp a ni lo va, an kutah sem tur a thleng tlem hle a. A dawng turin miin an semna hmun hla tak tak an pan a ngai a, mi an pun khawm tam thin avangin a hlauhawm hle nia sawi a ni.
Hamas hnuaia health ministry chuan GHF-in hna an thawh tan atangin an thil semna hmun pan tum mi 245 thah tawh niin mi 2,152-in hliam an tuar bawk niin an sawi.
US leh Israel erawh chuan GHF kaltlanga mipuia puihna sem hi Hamas-in puihna lutte an ruk loh nan an ti a. UN erawh chuan hei hi thil buaipuiawm ber a nih loh thu an sawi a, Hamas pawhin an ru ngai lo niin an insawi bawk.