GHF-in an sem hnuah ei tur lak tumPalestinian 1,000 thi tawh

GHF-in an sem hnuah ei tur lak tum
Palestinian 1,000 thi tawh
United States leh Israeli-ten an ruahman, Gaza-a chengte hnenah ei tur an semtu, Gaza Humanitarian Foundation (GHF)-in May thla tawpa hna an thawh tan atangin ei tur sem dawn tumtu Palestinian 1,000 chuang Israeli sipaiten an thah tawh niin United Nations-in a sawi.
“July 21 thleng hian Gaza-a ei tur lak tum mi 1,054 thah an ni tawh a; an zinga 766 hi GHF hmun huam chhunga thah niin 288 hi UN leh puitu pawl dang hnaia thah an ni,” tiin UN human rights office thupuangtu, Thameen Al-Kheetan chuan Thawhlehni khan AFP news agency a hrilh a, heng mite hi ‘Israeli sipaite thah’ tiin a sawi bawk.
Thawhlehni bikah khan Israeli sipaite hian puihna dawn tum mi 10 telin Palestinian 43 vel an that a. Tank -in a vawi khat nan chhim lam leh chhim lama Deir el-Balah khawpui an lut bawk.
Gaza-a health ministry chuan Thawhlehni khan Israel-in mi sual indona a kalpui leh puihna lut tur a an chu March atangin tlem a hawng a, Palestinian ramah hian ei tur kham hmu lo an pung zel a, darkar 24 liam ta chhung pawhin naupang pali telin mi 15 vel riltam leh ei tur kham neih loh vangin an thi tih a sawi.
Ni thum liam ta chhungin tam leh ei tur kham neih loh vangin naupang 21 an thi niin Al Jazeera Arabic chuan a tar lang bawk.
“Heng thihna hi Gaza-a damdawi in hrang hrang, Gaza City-a al-Shifa, Dier-a Al-Aqsa Martyrs Hospitalleh Khan Younis-a Nasser Hospital-a darkar 72 kal ta chhunga thleng a ni,” tiin Gaza-a damdawi in lian ber, al-Shifa Hospital-a an hotu, Mohammed Abu Salmiya chuan Thawhlehni khan thuthar lakhawmtute a hrilh.
Heng mite nen hian October 7, 2923-a Hamas kaihhruaia Israel chhim lam beih a nih hnua Gaza Strip-a tam avanga thi chu naupang 80 telin mi 101 an tling ta a ni.
UN agency for Palestinian refugees (UNRWA) chuan Gaza-a naupang maktaduai khat chuang chu an tam mek niin a sawi.
Save the Children-a humanitarian director Rachel Cummings chuan Gaza dinhmun chu ‘chhe rapthlak’ niin a sawi a. Hun rei tak ei tur kham tawp a awm tawh loh thu Al Jazeera hnenah a sawi.
Bazar a ruak a, tui lakna a chhia a, mi maktaduai hnih vel ‘tampui mitthi dinhmunah’ an awm mek niin Cummings-i chuan a sawi.