Ghost-in No.1 album an nei ve ta

Ghost-in No.1 album an nei ve ta
Swedish hard rock band Ghost album thar ‘Skeleta’ chu Billboard 200 (albums) chart No.1-ah a debut a, he chart-a Ghost album No.1 kai thei hmasa ber a ni.
‘Skeleta’ hi Ghost album Billboard 200 chart-a lang pha pakuana niin, 2013 khan an album pahnihna ‘Infestissumam’ chu chart No.28 niin, hei hi chart-a an lanna hmasa ber a ni a, ‘Skeleta’ hi he chart top 40-a lang pha album pariat an neihna niin, top10-a lang thei album panga an neihna a ni bawk. 2022-a an album ‘Impera’ chu No.2 kaiin, hei hi he chart-a an thlen san ber a ni thin a, tunah chuan No.1 album an nei ve ta a ni.
Billboard 200 chart hi kar khat chhunga US-a album hralh tam dan atanga chhutin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
‘Skeleta’ hi kar khat chhungin US-ah 86,000 an hralh thei a, hei hi chart-ah a No.1 pui a, chung zinga 77,000 chu album tak tak hralhna niin, streaming atangin 9,000 (on-demanf official streams maktaduai 12.45) tlingin, album-a hla a mala hralh erawh chhiar tham a ni lo.
‘Skeleta’ hi tun kum li chhunga hard rock album Billboard 200 chart-a No.1 thei awm chhun a ni a, kuminah pawh rock, hard rock leh alternative album zinga No.1 album awm chhun a la ni. ‘Skeleta’ hmaa he chart-a hard rock album No.1 ni thei hnuhnung ber chu AC/DC ‘Power Up’ kha niin, November 2020-ah No.1 a kai.
‘Skeleta’ hi tunkar Billboard 200 chart top 10-a album lang thar awm chhun niin, No.2 atangin No.7 thleng chu chart No.1 lo ni tawh vek niin- SZA ‘SOS’ chu 52,000 hralh lehin No.1 atangin No.2-ah a tawlh a, Kendrick Lamar ‘GNX’ chu 48,000 hralh lehin No.2 atangin No.3-ah a tawlh a, Morgan Wallen ‘One Thing at a Time’ chu 46,000 hralh lehin No.3 atangin No.4-ah a tawlh a, Sabrina Carpenter ‘Short n’ Sweet’ chu 44,000 hralh lehin No.4 atangin No.5-ah a tawlh a, PARTYNEXTDOOR leh Drake album intawm ‘$ome $exy $ongs 4 U’ chu 43,000 hralh lehin No.5 atangin No.6-ah a tawlh a, Bad Bunny ‘Debi Tirar Mas Fotos’ chu 38,000 hralh lehin No.6 atanging No.7-ah a tawlh ta bawk.
Shaboozey album ‘Where I’ve Been, Isn’t Were I’m Going’ chu 35,000 hralh lehin No.45 atangin No.8 a kai thar leh a, he album hi nikum June thlaa an tlangzarh kha niin, chart No.5 te pawh a lo kai tawh a, tunah hian hla thar paruk dah belhin a deluxe version an tlangzarh leh a, hei hian album hralh a tikal thar leh ta a ni.
Chart No.1 hlui Playboi Carti ‘MUSIC’ chu 34,000 hralh lehin No.7 atangin No.9-ah a tawlh a, chart No.1 hlui Morgan Wallen ‘Dangerous: The Double Album’ chu 33,000 hralh lehin No.9 atangin No.10-ah a tawlh ta bawk.