GIG Motors-in 2024-2025 lirthei 2350 hralh Sorkar-ah chhiah vbc 54 chhung lut

Mizorama Maruti Suzuki dealership GIG Motors chuan 2024-2025 financial year chhungin lirthei 2,350 hralhin, sorkarah chhiah cheng vaibelchhe 54 chuang an chhung lut tih an tarlang a, GIG hian 2024 Youth Icon runner up Peter Lalnunpuia’n car thar a dawn theih nan Rs 1,00,000 thawhin, Peter-a fan-te pawisa thawh tlingkhawm nen Wagon R an hlan nghal bawk a ni.
Thawhtanni zan khan Edenthar-a an showroom-ah 2024-2025 Financial Year Closing Programme an hmang a, hetah hian kum khat chhungin chhiah (tax) cheng vaibelchhe 54.72 sorkar-ah an chhunglut niin an tarlang a, Mizorama chhiah pe tam ber pawl an ni thin a, tun financial year kaltaah pawh hian Mizorama chhiah pe tam zingah an tel leh ngei a an inrin thu an tarlang.
Hetihrual hian an kum khat sum chevel (annual turnover) hi 2024-2025 chhungin cheng vaibelchhe 278.93 a tling a, chu chu chawhrualin thla khatah cheng vaibelchhe 23.24 ang vel zel a ni a, an chhiah pek pawh hi chawhrualin thla khatah cheng vaibelchhe 4.56 ang vel zel a ni bawk.
GIG Motors hi 2017 atangin Maruti Suzuki dealership an ni tan a, March 2025 thlengin an showroom hrang hrang atangin car 17,244 an hralh chhuak hman tawh a, Mizorama car hralh chhuak hnem ber an ni. GIG hian Arena, Nexa leh Commercial Vehicle tan showroom hrang theuh neiin, heng showroom hrang hrang atanga an lirthei hralh chhuah belhkhawm chu 2023-2024-ah lirthei 3,215 tlingin, 2024-2025-ah 2,350 an hralh ve thung.