Goa nightclub kang neitu Luthra unau bail dilna hnawl
Goa nightclub kang neitu Luthra unau bail dilna hnawl
Mapusa-a District & Sessions Court chuan December thla tir lama Goa-a mi 25 thihna nightclub kang ta, Birch by Romeo Lane neitu, Luthra unau — Saurabh leh Gaurav Luthra ten bail an dilna chu a hnawl.
District Judge Apurva Nagvenkar-i’n court thutlukna hi Ningani khan a puang a. Luthra unau aiawha ding, Parag Rao-a chuan hmalak zui zel dan tur an ngaihtuah leh dawn tih a sawi nghal.
“Court chuan bail an dilna a hnawl tih a puang a. Thupek hi a copy kan la hmu lo va, kan hmuh hunah a hnawl chhan hi kan zir chiang ang,” tiin a sawi.
“Thuremna hi kan hmuh hunah hmalak dan tur kan ngaihtuah leh ang a, high court pawh kan thleng thei a; mahse, an ai ka dinsakte nen kan inrawn leh dawn a ni,” a ti.
Club kanga thi chhungte aiawha ding, Advocate Vishnu Joshi-a thung chuan court-in bail dilna a hnawl chu a tuartu chhungte tana dikna hlen chhuaha a awm theih nana rahbi pakhat a nih thu a sawi.
“Vawiin hi an chhungte thite tan hnehna ni rahbi hmasa a ni a. Rei tak beih ngai tur a ni a; mahse, kan duh ang kan hmuha hremna pek an nih hma chu kan bei zel ang ang a. Dikna chu a dingchang dawn a ni,” a ti.
Arpora-a Birch by Romeo Lane hi dan lova nightclub din niin December 6 leh 7 zan khan kangin mi 25 an thi a. Luthra unau hi an club a kan hnu rei vak lovah Thailand an pan zui a, Interpol-in notice a chhuah hnuah an passport tihthih lailawk niin man an ni a, India-ah hruai haw an ni a, hren mek an la ni.
Thi zinga panga hi khualzin niin 20 erawh thawktute an ni a, lâm laia a tihmuhnawm tura electric hmang pyro sparkler atangin kangmei hi a chhuak nia hriat a ni a. Maua siam a chung man kaiin nasa takin a kang ta a ni.
Goa police chuan mi panga an man tawh a. Luthra unau bakah an sumdawnpui, Ajay Gupta bakah phalna nei lova nightclub kalpui tura phalna petu, Sarpanch Roshan Redkar leh Panchayat Secretary Raghuvir Bagkar te an ni.
December 7-a FIR thehluhah Bharatiya Nyaya Sanhita Section 105, 125(a) leh (b) leh 287 tlawhchhanin thubuai siamsak an ni.
FIR dang thehluhah lehkha lem siama mi bumah Luthra unau leh Gupta hi puh an ni a, club din nana dilna an thlenah lehkha lem an siam nia puh an ni.
Luthra unau hi Enforcement Directorate-in an chhui mek bawk a, thla hmasaa an hmunhma an dapah Rs. vaibelchhe 22 an nei tih hmu chhuakin hengte hi ‘dan bawhchhiat nana hman’ a ni em tih an chhui mek.