Goa nightclub kangah mi 25 thi

Goa nightclub kangah mi 25 thi
India-a tuipui kam state, Goa-a nightclub-a kangmei chhuak avangin mi 25 an thi niin tual chhung thuneituten an sawi.
Thi zinga tam zawk hi tuipui kam maia awm, Birch by Romeo Lane nightclub-a thawkte an ni a, khualzin thi an awm nual bawk.
Police chuan chokaa gas bur puak vanga kangmei hi chhuak niin an ring a, Inrinni zan lai vela thil thlengah hian a hmunhma hi a puak darh nasa hle tih an sawi.
Nightclub manager chu man nghal a ni a, a neitu manna tur thupek chhuah nghal a ni bawk.
Goa hi Arabian Sea-a Portuguese awp thin a ni a. Zanah hian a tuipui kamte a nawm thin em avangin mi maktaduai telin chawlh hmangin an tlawh thin.
Chhiatna a thlen lai hian Bollywood specialist DJ sawm a nih lai a nih avangin mi an tam hle.
A luhna hi a zau tha a, dil tereuh te kal kânin a hmunhma tak tak luhna a awm a, he erawh a zim a, kang thelhtute tan pawh thlen mai a harsa a ni.
“Kang hi choka chhehvel chhuatah a ni tlangpui,” tiin Goa police chief Alok Kumar-a chuan a sawi a. Ruang tam ber pawh choka bula chhar niin thawktute an nih a rinawm hlawm niin a sawi.
Goa Chief Minister Pramod Sawant-a chuan kang hliam vangin mi pathum an thi a, mi dangte hi thaw chhama thi niin chanchinbute a hrilh.
Khualzin pathum pali vel an thi niin a sawi bawk a, khawi ram mi nge an nih leh an kum zat erawh a sawi lo va. Mi paruk damdawi inah dah an ni bawk tih a sawi.
Pathianni tukah khan emergency team chuan kang chhe tak karah kangmei chhuah chhan chhui hna an thawk tan nghal a. Vengtu pawh tam tak dah niin nightclub hi khar a ni a, tumah luh phal a ni lo.
Chhanchhuah hna thawktute chuan ruangte chu Panaji-a Goa Medical College-ah an la a. An zinga pariat chu thawktu niin Jharkhand, Assam leh Uttarakhand atanga kal an ni tih finfiah a ni tawh.
Chief minister chuan kangmei chhuah chhan chhui nghal a ni tih a sawi a, “Dan bawhchhia an awm chuan dan anga na taka hrem a ni ang a, tumah ngaihdam an ni lo vang,” a ti.
Prime Minister Narendra Modi pawhin Goa-a kangmei chhuaka thite chu an chhungte a tawrhpui tak zet tih a sawi.
Goa-a hi kumin kum chanve thleng khan mi maktaduai 5.5 chuangin an tlawh a, sorkar chuan mi 2,70,000 chuang chu ram pawn mi an ni tih ansawi.
India ramah hian tun hnaiah intihhlimna hmuna kangmei nasa tak tak chhuak a awm zauh zauh.
May thla khan chhim lama Hyderabad khawpuiah chhawng thuma sang kangin mi 17 an thi a. Hmarchhaka Kolkata-ah a hma thla chiaha khualbuk kangah mi 15 an thi bawk.
Nikum khan khawthlang lam, Gujarat-a amusement park arcade kangah mi 24 an thi a, tam tak an tang bawk.