Goal 900 thun tling thei Cristiano Ronaldo

September 6, Ningani zan khan UEFA Nations League 2024-25 khelh tan a ni a, League B-ah Portugal in hnehna nen bul an tan. Portugal in 2-1 a Croatia an hneh tumin Cristiano Ronaldo chuan goal khat a thun a, Ronaldo hian club leh ram tan goal 900 thun tlingin, mel lung pawimawh a phun. Portugal an chak lai hian Euro 2024 champion Spain chuan Serbia lakah hnehna an chang zo lo.
League A, Group 1 a inkhelah Portuhal hian Estádio da Luz, Lisbon-ah Croatia an mikhual. An mikhual lakah an khel tha viau a, chawlhlawk hmain goal hnih an thun hman. Portugal tan hian inkhel tan atanga minute 7-na lekah defender Diogo Dalot chuan hmahruaina goal a thun. Hma takah goal an thun vangin inrintawksa sang zawk nen an inlan chhunzawm a. chawlhlawk hmain goal khat an thun belh leh. Chawlhlawk dawn hnaih minute 34-naah Cristiano Ronaldo chuan an goal hnihna a thun a, an hmahruaina a tizau. Ronaldo goal thun hnu hian goal hmahruai thuntu Diogo Dalot chuan minute 41-naah an lamah a ti-goal a, Croatia si phurh a sut then sak.
Chawlhlawk hmain goal thum ngawt lut mah se chawlhlawk hnu lamah goal a luh belh thei lova, Portugal in an mualah hnehna changin point thum an hmu. Group 1 a inkhel dangah Poland chuan mikhual an nihna hmun Hampden Park-ah 3-2 in mualneitu Scotland an hneh a, Group 1-ah hmahruaitu an ni nghal.
Croatia lakah Portugal goal hnihna thuntu Cristiano Ronaldo khan club leh ram tan goal 900 a thun tling chiah a, player ropui bik a nihzia a lantir zui zel. Ronaldo hian a club hmasa ber Sportling Lisbon tan goal 5 a thun a. Real Madrid tan goal 450, Manchester United tan goal 145, Juventus tan goal 101 leh Al-Nassr tan goal 68 a thun tawh bawk. Club tan goal 769 zet a thun tawh bakah Portugal tan goal 131 a thun tawh bawk a, club leh ram tan goal 900 zet a thun tling der tawh. Ronaldo hian penalty atangin goal 164 zet a thun a, free kick atanga goal 64 thun tawh bawkin, vawi 66 zet hattrick a siam tawh bawk. Goal 900 a thun zinga 768 zet hi box chhung atang a thun a ni a, goal 132 zet hi box pawn atang a thun a ni bawk.
Ronaldo hi footballer ropui ber a ni em tihna zawhna lian tak a awm ang bawkin Ronaldo hi footballer zinga goal thun hnem ber a ni em tih zawhna lian tak a awm bawk. Brazil player ropui pahnih Pele leh Romario te kha goal 1000 chuang thun anga sawi thin an ni a, fiahfai taka an goal thun zat tihchianna erawh a awm lo. Unofficial statisticians RSSSF in an tarlan dan chuan Football lalpa an tih hial Pele khan goal 778 a thun a, Romario khan goal 785 a thun ve thung. Ronaldo elpui lian ber Lionel Messi chuan goal 867 a thun tling tawh. Heti a nih chuan Ronaldo leh Messi te hi Pele leh Romario chunga leng an ni. Goal 900 thun tling tawh Ronaldo hian a la duh tawk mai lova, goal 1000 thun tlin ngei a duh thu a sawi. Club leh ram tan player pawimawh a la ni a, goal 100 thun belh theihna hun tha a la nei.
Goal 900 zet thun tling tawh Ronaldo hian club khat laka goal a thun tamna ber chu Sevilla a ni a, Sevilla lakah hian goal 27 zet a thun. Ronaldo hi ram tan goal thun hnem ber a ni a, a record khum a har hle tawh dawn, Inelna ngaihhluthlawh tak Champions league leh Euro-ah goal thun hnem ber a ni bawk.
Result dang
Ningani zana inkhel dangah Euro 2024 champion Spain chuan Serbia an hmachhawn a, Serbia lakah hnehna chang zo lovin, goal awm lovin an inhnehtawk. Inkhel dangah Denmark chuan si hnih faiin an mikhual Switzerland an hneh ve thung.