Goal khung bawk, red card hmu bawk Diaz!

Mualneitu Bayer Leverkusen nen si khat ve ve thuna an inhnehtawkna goal khungtu Bayern Munich forward Luis Diaz chu hun tawp dawnah yellow card tum hnih hmuh vanga hnawhchhuah a ni.
Inrinni zan BayArena chhunga mipui 30,210 chhuak khawm hmaah minute ruk an khel tling hlawt tihin Aleix Garcia chuan Leverkusen hmahruaina goal tilutin, Bundesliga hmahruaitu Bayern lamin an si khat chhuah hi chawlhlawk hmain an sut zo lo.
Second half tir lam minute 69-ah Liverpool striker hlui Diaz chuan season kal laia Munich tana a goal 21-na leh mikhual team si phurh sutna goal ni zui nghal thunin, minute 84-ah tlukder vanga yellow card a hmuh leh avangin Colombian hi hnawhchhuah a ni.
A hmain half time dawnah fit-again top scorer Harry Kane aia luhhmasak chang Nicolas Jackson hnawhchhuah a lo nih tawh bawk avangin Bavarians hian player pakua chauh niin a tawp an khar!
Darkar khat an khel tling hlawt tihah damkawr Kane chuan bench thawhsanin khelmual lut bawk mah se tuntum chu goal a khung zo lo.
Title race-a Bayern hnaihbertu Borussia Dortmund chuan Inrinni inkhel dangah si hnih faiin Augsburg hneh mah se khelh riat chiah awm tawhah point kua laiin an chung chiaha hmahruaitu Vincent Kompany team nen an la inthlau.
Bayern hian nizan result tarlan hman loha an mikhual Atalanta an hmachhawn zawhah chuan Champions League quarter-final lut turin an dinhmun an sawhnghet tawh dawn a; last-16 first leg-ah 6-1 hnehna an lo chan tawh avangin tlang chiang tluka ngaih an ni tawh.
German top flight Bundesliga table-a parukna luah mektu Leverkusen chuan Thawhlehni zan khan first leg-a 1-1-a an inhnehtawkpui tawh Premier League hmahruaitu Arsenal an luhkhung ve thung a; Emirates stadiumah German-ho hi si hnih faiin an tlawm a, khelh hnih belhkhawma 3-1 hnehna nen Gunners-in quarter-final an lut ta zawk a ni.