Goal khung thulh thei lo Messi
World Cup winner Lionel Messi chuan Pathianni zanah goal hnih thun lehin a club vawn lai Inter Miami chu FC Dallas lakah penalty shootout hmangin 5-3 hnehna a chanpui a, Leagues Cup quarter-final an lut.
Argentine lo lan hmaa a zawna match 11 chak chhung tehreng chak ni hmel hmu tawh lo Major League Soccer club hian Messi an chhawr hnua an game khelh paliah hnehna an chang fai vek a, Messi zawng US leilungah pawh a la Messi tluang zel e!
Pathianni inkhelah FC Dallas hian hun tawp hma mi nute 10 chauh awm tawh tihah 4-2-in hma an la hruai a, last eight lut zawk tur awm takin an lang hman a, mahse, Inter hian hun tawp dawnah goal hnih khungin an siphurh an sut zo a, penalty petah hian an vannei zui ta a ni.
Texas khawpui pakhat Frisco-a Toyota Stadium inkhelah hian Barcelona leh Paris St-Germain forward hlui Messi chuan tan atanga minute rukna lekah goal hmahruai thun mah se Dallas lam hian darkar khat an khel tling hlawt tihah 3-1-in hma an hruai hman a; midfielder Benjamin Cremaschi chuan Miami siphurh pakhat sut then mah se Robert Taylor-a own goal hmangin Dallas lam bawkin sihniha an falna an chhunzawm leh.
Minute 80-ah Miami beiseina siamsak turin Marco Farfan chuan Messi ball siamchhuah chu an lam goal-ah a tauhlut palh a; hun tawp hma minute nga chauh awm tawhah kum 36 mi Argentina captain hian kual kawi ngawka free-kick chhuihin an siphurh a sut zo a, ti hian, a club thar tana game li a khelhah goal sarih tehreng a thawh tling ta!
Messi goal thun hmanga Miami lamin penalty shootout an thlen hnu hian Messi Barcelona team-mate hlui Sergio Busquets chuan cool zeta chhuihlutin, a hnua pet Paxton Pomykal chuan Dallas tan a thelh a, Inter Miami an tlang ta zawk a ni.
Kum 2019 atanga khelh tan Leagues Cup kal laiah Inter Miami hi quarter-final lut hmasaber niin, he tournament hi, tarlan tawh thin angin, United States leh Mexico club-te’n knockout format hmanga an khelh mi a ni.
Hnehna an chan hnuah Miami manager Gerardo Martino chuan minute 80 a nih vung tawh laia 2-4-a la hnufual chunga hnehna chanlet kha ropui a tih thu leh an result-in a tihhlim thu a sawi a, chak lawm hman an la nih loh thu leh an hmabaka insiamthat ngai lai awmte ngaihtuah hun a nih rih thu a tarlang tel.