Goal nena bul tan Messi

Goal nena bul tan Messi
Lionel Messi chuan Zirtawpni zan khan a club thar Inter Miami tan inelna a hmachhawn tan a, free-kick chhuihlutin Cruz Azul lakah a team a chakpui.
Argentina captain Miami debut hi Florida lama Fort Lauderdale khelmual DRV PNK Stadium-a khelh niin, Leagues Cup Group J match-a an tumpui Azul nen 1-1-a inhnehtawk thei mai dawna an lan hnu hun tawp hma second tlemte chauh awm tawhah Paris Saint Germain striker hlui hian free-kick atangin Inter goal hnihna leh 2-1-a an chakna goal ni zui ta a khung a, Liga MX club lakah a team thar chu hnehna a chanpui nghal.
Hun tawp hma minute khat pawh tling tawh loah Messi hian goal atanga pen 25 vela hla atangin goal lamah ball a thawn phei a, goal veilam sir chung lamah thlawklutin, stadium chhung mipuiin Messi laka an beisei ‘magic’ an chang chhuak a, Inter Miami fans thawm a tha ngang mai.
A club thar tana a goal hmasaber a khung zawh rualin Messi hian khelmual dinglam kil sir lam panin a ban pahnih a pharchhuak a, chu laia a nupui fanau lo awmte nen an inkuah zui nghal.
Inkhelh banah Messi hian tawnglettu hmangin amah bawrtu chanchinbumite a hmachhawn a, “Kha free-kick kha ka chhuihluh ngei ngei a ngai tih ka hria a, kan game khelh laia a hmawrbawkna a ni tawh a, penalty a awm loh avangin ka thun a ngai.
“He hnehna hi kan tan a pawimawh takzet a, a chhan pawh tournament thar a ni a, hmalam kan pan zelna tur kawnga inrintawkna min petu atan a pawimawh a ni,” a ti.
America leilunga Messi bultanna inkhel ticket zuartute an luck hle a, an hralh tur neih zawng zawng ti zoin, a hmuna milar tak tak hmuh tur awm zingah vawili ngawt NBA champion ni tawh LeBron James, tennis great Serena Williams leh reality television star Kim Kardashian an langsar a, club neitu zinga tel David Beckham pawh hmuh tur a awm bawk.
Miami lamin sikhat faia hma an hruai laiin Messi chuan second-half substitute niin khelmual a lut a; minute 54-a a luh hnuah ‘world number 10’ tia sawi hian a ban veilamah captain armband hreng nghalin, ball a tawk fuh apiangin mipui an au khawk ruih ruih thin.
Ballon d’Or chawimawina vawi sarih dawng tawh hian a luh phat atangin huhang a nei nghal a, Cruz Azul defender-te a paltlang fo a, ding lam sir atangin ‘attack’ hlauhawm a lantir fo a, Inter Miami goal hnihna leh chakna goal a thawh zui ta hial a ni.
Kum 36 mi hian chakna goal a chhuihluh hma minute 89-ah chakna goal thlen thei tura ngaih ‘chance’ tha siamchhuak mah se a siamsak Martinez-a goal chu off-side vangin hnawlsak a ni.
Inter Miami co-owner David Beckham chuan chakna goal chungchang sawiin, “Free-kick ka hmuh rual khan hei ngei hi kan drama hmawrbawkna tur a nih hi ka ti a; kan fans tana phurna sosang thlentu a ni ta chiah a; he’ng mipui lo pungkhawm zozaite hi Leo khelmual rap lai hmuh tumte vek an ni a, a tihtur chu tihtir mai tu.
“Stadium chhunga awmte zawng zawng tan kan chak dan kha mumang a taka lo chang ang mai a ni a, he rama mite zawng zawng hian MLS-a Leo inkhel lai hmuh an chak vek a, sawi ngaihna pawh ka hre lo,” a ti.
A hma karliamta Inrinni mai khan kum hnih leh a chanve chhung atana Miami leh Messi inremna contract chu official-a tihfel niin, Pathianni zanah lawmluh a ni a, Thawhlehni atangin a full training session hmasaber a tan a, Zirtawpniah a debut nghakchhuakin, chakna goal nen hming a chher leh nghal.
Inter Miami hian group stage game hnih an khelh tura a hnuhnung zawk chu naktuk, Thawhlehni hian an khel zui leh dawn a, Leagues Cup knockout stage luh beiseina nen Atlanta United an mikhual ang.
Leagues Cup an khelh mek hi World Cup-style tournament niin, MLS leh Mexico top flight Liga MX team-te inelna a ni
United States, Mexico leh Canada-te’n 2026 World Cup an inthlentawm dawn laia MLS lama Messi insawn hian north American football boruak chu kawikang zual hle tura ngaih a ni.