By Familia Fanai Lal\ansanga
-- Advertisement --
March 19, 2023 kha Mexican chemist Dr Mario Molina pianchamphaphak vawi 80-na a ni a, Google chuan Doodle-ah a lem tichhuakin an chawimawi a ni.
Ani hi ozone thuahthip pan thu hmuchhuaktu leh khawvel ram hrang hrangte hnena ozone thuahthip pan lai tiphui leh tura hmin theitu a ni a, a thawhhlawk hle a ni. Kum 1995 Nobel Prize in Chemistry dawng pahnih zinga pakhat zawk kha a ni.
Chemistry hi subject har tak, kan ni tin nuna han chhawrbawk nghalna mai tur vang angreng tak a ni lawi a, Mizo zingah phei chuan M.Sc/ Ph D (Chemistry) hi khawvar lam arsi ang maia khât pharh an ni.
Van mawng pawp
Van mawng pawp an tih mai ‘Ozone depletion’ an tih kha a ziaawm tawh a, a inthawm tha leh vek tawh a ni. Chu chu siam thar lehna chi khat a ni a, regeneration tiin a sawi ve theih mai ang em?
Mizote hian insawi thaih theology hi kan ei zawng ni hmiang ka ti mai a, Iraq indo lai khan khawvel tawp hnaih tawhzia pulpit-ah hahip tak meuh meuhvin an sawi hlauhawm chiam chiam a. Ozone pan thu kha insawi thaih nan teh an hmang chiam bawk a, sual sim phah nan chuan kan hman phah awm pawh ka hre lem hlei law.
China ral lo lian mai tur angain Zoram khawvar hun nghaktuten an sawi chiam a, thim thuah hnih an ti! Zawlnei Saikhuma thlanah Pu Lianhmingthanga nen kan inhnial chiam a, thil eng emaw tak hmuh leh hriat zawng a nei a ni chêk ang. Ben harh mai mai chi a ni awzawng lo mai. Mizo theologian Rev. Hrangkhuma ka zawt a, “A! Anni ho hian thu dawn chu an nei a ni. Hmasang atanga ringtuten kan chhut sual fo chu Pathian hun ruat hi a ni,” a ti a. Ka pawm zawng tak a ni.
Pathian thuzir mi, theologian ten an sawi duh tehchiam loh thu hi han thlasik mau puah leh phawng phawng ta mai ila: Tirhkoh Paula leh Thupuan ziaktu Johana te hi chuan Pathian lo kal hi an ring hnai leh lutuk mah mah em aw, ka ti deuh va. Zai pawl zinga a silar sa ring, aw titlawk nasa bik ang deuhah ka chan a. “Inring rengin awm rawh u, in rin loh hunah Mihring Fapa a lo kal dawn si a” (Matt 24:44). “Nimahsela, chu mi ni leh a hun tur chu Pa chauh lo chuan tu ma’n, vana vantirhkohte pawhin, Fapa pawhin an hre lo” (Matt 24:36) tih ziak a ni reng si a. Chhim lam Pathian thu awih hmasa, kum 1906-a Khasi ram Mairanga harhna chhima kal tur zinga an thlan, mahse a ke a nat avanga Aizawl thleng chauh kal ta Parima pawhin Pathian lo kal a hnai tawh lutuk niin a ring a, a hreipui a paih a ni. Parima thlalak pawh hi ka kawl tha khiau tak asin.
Ozone chu eng nge ni a?
Ozone hi trioxygen a ni a, a chemical formula chu O3 a ni. Oxygen atom hi O a ni a, Oxygen molecule chu O2 a ni a, Ozone chu O3 a ni. |ek a tlak lai te leh Ni zung zam chi khat ultraviolet light (UV)-in Oxygen molecule a chhun avang tein Ozone hi a rawn insiam thin a, Ozone ang hian a awm rei tak tak thei lo va, Oxygen pangngaiah bawk a let leh thin a. Chuvangin Ozone hi a tam thei lo va, a tlêm em em zel a ni. Mahse pawimawhna tak a nei si a ni. Mihring leh ran leh ramsate tana Ni zung hlauhawm ti mai ang, Ultraviolet radiation (UV-B) laka venghimtu a ni tlat.
Lei tuamtu boruak thuahthip hi a lum dan azirin chi hrang hrangin an thliar hrang a. Lei atanga van kan tih km 6 atanga km 10 vela sang chin hi Troposphere an ti a, a ai sang leh km 50 thleng khian Stratosphere an ti a. Chutah chuan Ozone thuahthip chu pan tê hian a awm ve a. Stratosphere aia sang chu Mesosphere an ti a. Lei atanga km 500 aia sang chu Exosphere an ti a ni.
Ozone thuahthip pan tial tial
Khawvel hmasawn zelin a ken tel thil chi hrang hrang avangin Ozone thuahthip hi a pan tial tial tih kum 30 kal ta vel atang khan hmuhchhuah a lo ni ta a. A pan tial tialna chhan hi mihring siam CFC (chloro-flouro-carbon) te, Nitrogen oxide te, chlorine te leh bromine boruak vang te a ni ber a. Ozone thuapthip a pan zel chuan Ni zung zam chi khat Ultraviolet radiation (B) chu duhthusamin Ozone hian a lo dang thei dawn lo va, mihring, ran leh ramsa te hriselna a nghawng thei a ni. Mit râng (cornea) chhiatna te, mit darthlalang(lens) chhiatna te, mit pual (cataract) te, vun cancer te bakah kan taksa natna dotu (Immune system) te a tichhe thei a ni.
Antarctic & Arctic Ozone Hole
Ozone hole han tih hian a pawp tihna a ni lo va, Antarctic leh arctic chung zawnah Ozone a pan hle tih an hmuhchhuah thu mai a ni zawk. 1985 kum khan hmuhchhuah a ni.
Ozone thuahthip pan thawm that leh dan tur ngaituah
Kum 1987 September ni 16 khan UN huaihawtin khawvel ram hrang hranga scientist te chu Canada ram Montreal khawpuiah inhmukhawmin Ozone ei chhe thei thil (Ozone-depleting substances@ODS) tihtlem chungchang thuthlung pawimawh tak, Montreal Protocol an tih chu an duang chhuak a. He ni denchhen hian kum 1995 January ni 23-a neih UN General Assembly inkhawmpui chuan September ni 16 hi kum tin Ozone venhim pawimawhzia inzirtirna ni bik atan a lo ruat ta a ni.
Eng nge kan tih ve tak ang?
Ozone tichhe thei thil tihtlem chungchanga kan tih ve theih awm chhun, thil ho te anga lang, mahse tangkai tak si chu, fridge, air conditioner emaw, spray lam chi kan lei dawnin CFC Free emaw Ozone friendly tih chuang ngei chauh lei hi a ni mai.
Ozone pan a inthawm tha leh tawh
Montreal Protocol thuthlung an duan atang khan khawvel pumhuapin Ozone ei chhe thei thil an tihtlem telh telh avangin Ozone thuahthip pan tial tial pawh a inthawm tha leh chak hle tawh a. Montreal Protocol khan rah duhawm tak a chhuah a, a hlawtling a ni. UN World Meteorological Organization (WMO) chuan khawvel hmar tawpa Ozone thuahthip pawp chu a inthawm tha leh vek tawh tih thu lawmawm tak an puang dum dum mai a ni.
To be, or not to be, that is the question
Van sang taka awm Ozone boruak chanchin kan sawi lai mek hi mahni khawtlang, mahni veng leh mahni chhungkuaah han seng lut (relate) ta ila; a ngaihna hria han tih te, remchang hria han tih mihring hi an awm a. Ozone pan tial tial pawh a ei chhetu an hriat chhuaha khawvel pum huapa beihpui an han thlak tak tak chuan a inthawm tha leh mai a ni. Eng vangin nge kan khawtlanga sualna hi kan tihrêm theih hlek loh chu le? tih zawhna hi khumlai zawlah bengsikin ka ngaihtuah chamchi a. A chhanna dik hmu chhuakin ka inhria a ni.
Mizote hi hnam naupang tê kan ni a, inkawmho let let, inpawlho nuam ti tak hnam kan ni a. Mahniin kan awm fal thei mang lo a ni. Amah Rev.Dr. K.Thanzauva sawi ang hian chu Mizo nun nena inmil tak chuan kohhran tin hian inkaihhruaina dan kan siam a. Mahni in lum luah lum hman lêk lovin kan pit chhuak zut reng mai a. Naupang hi an rilru, hlum anga a nem laia enkawl hunah hian kan enkawl hman loh vang a ni berin ka hre ta a ni. Kohhran chak tak angin kan lang a, a chhunga kohhran mipuite chhungkuaah nget lian pui a awm tlat a. Inthup kan tum a. Lem ka chang ta chiam vek hlawm ta mai a ni. Kohhran chak tak anga langa memberte chhungkuaah khan mawih leh tawih a awm tlat a, Kohhran nena inngheng reng kan khawtlangah khan sual a ngampa ta em em mai a ni.
Pathian hnam thlan Israel fate chu Pathian hnam thlan an nih avangin vohbik nihna an nei ngei a, mahse an nei puitling ziktluak leh lawi si lo, A thu an awi tlat loh avangin. A hnam thlante anga A sawp leh A sawisak leh A tihduhdah leh A hrem nasat hnam hi khawvelah hian hnam dang an awm lo, ti ila, thu kan ba sa ngam lutuk a ni hran lo tawp ang.
Mizote hi Kristian sakhua kan vawn avangin sakhaw dang biate aiin vohbik kan nihna a awm ngei ang a, kan chan pawh a vâwng ngei tur chu ni awm tak a ni a. Mahse a ni si lo. Engvang nge? Israel hnam ang bawkin LALPA thu zawm tlat hek lo i! Mahni ngaihin tha kan inti a, sual kalsan hek lo i! Aids vei kan pung tual tual a, cancer vei leh zunthlum leh thisen sang vei kan tam nangiang mai. Pathian hming hi a narana lam nasa ber hnam kan ni hial awm mang e, te ka ti rum rum thin asin.
Ozone thuahthip pan chhan an chhui chhuak a, a thawm that leh dan tur damdawi an hmu mai. Mizorama sual pun chhan dik tak hi hmuh chhuah phawt a ngai a ni. Sual pun chhan pakhat chu mahniin fianrialah Pathian zawn hmuh kan tum lo va, mahniin mahni eizawnna mual theuhah rinawmna nen Pathian chibai buk (worship) kan tum tlat lo bawk hi a ni ngei ang.
Kan biak Pathian hian he khawvel hi duh taka a siam leh a siam tirh pawha a en a, mawi leh tha a tih em em kha a ni miau va, khawvel hi a titawp mai phalin ka ring thei lo va.
Chuvangin tuilettir kher ngai lo pawhin antam suat thawl angin khawvel mihring sual lam awn reng suat thawl dan hi a hre em em turah ka han ngai ngawt a. Thlarau lam nun kher lovah pawh hian khawvel hi siam thar leh a ngai a, din thar leh a ngai a, ka thu laimu hi “rebirth” or “regeneration” (Ancient Greek: romanized: palingenesia) tiin sawi ve ta mai ila, a dik thawkhat thei ve mai chuan ka ring a ni.
Khawvel hian siam thar lehna, din thar lehna hi a mamawh a, Coronavirus pandemic hi a leng ta chiam a, “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai thîn a”, Lalpa ringtu dik tak, Lalpa tihtute tan chuan zamna tur a awm lo ve, ka ti ve tlat a ni. Ve tlat mai a!