Daily Newspaper

Krismas-in Mizorama Zun a neih Dan

10

C. Vanlal Ruaia
Ph. 9862569310

Krismas boruak hi Mizote tana thil thar a ni lo va. A hun leh boruak hi chu Mizo pipute hun atanga an lo hmelhriat leh an hun pui Kut an hman hun a nih avangin an lunglenna (sentiment) siamtu chu a ni. Kristian kan nih hnu khan Krismas-in kan thlak mai a ni zawk.

1. Pianna Hmun:
Pianna (Origin) hmun, min chawi liantu boruak kha a ni a. Enge Origin chu kan ti mai thei, khua-leh-tui, khaw awmdan mawi tak mai, Furkhawthiang lunglenna thlen theitute pawh a ni ang. Origin chu i pianna hmunhma boruak sulhnu kha i thluakah a in-record ngheh em avangin i mumangah i hmu fo ang damchhungin. Chu chuan hla te pawh a hring chhuak thin a ni a. American Rocky mountain tlangdung leh Colarado lui te chuan hla mawi tak tak a hring chhuak thin. Chutiang ram mawi leh hlimthla-sulhnu chuan kan damchhung a daih tawh thin. Putar kum 80-ah pawh a naupan lai khaw awm dan a mumangah a hmu let leh thin a. A pian seilenna ram hlimthlate chu a mumangah a hmu chamchi a, a seilen hnu a, a thenrual chhar thar te, a ram fanna leh a chen hlen tak hialna ram te pawh a mumangah lan chang awm thin mah se, an lang fo thei ngai lo a ni. A pianna naupang hun a hmanna hmun erawh damchhung a daih tawh thin a ni. Kan seilen hnua kan thian chhar tharte pawh chengho reng kan nih loh chuan kum a kal leh deuha kan theihnghilh zui mai thin. Mihring hian kum 30 kan nih hnu hian thluaka kan thil record a nghet lo tan a. Naupang apiangah record/hriatna a chak bik avangin kan thluaka thil record kha a reh thei tawh lo a. Engmahin naupan lai thluaka record a luahlan thei lo va. Naupan laia thluak a thil tha record hnem chu mi rawn tlak an ni thin. Mitinten, an mumangah an pianna ram leh seilenna an hmuh theuh ka ring a. Chutiang bawkin naupang an nih laia Christmas hlim taka an hman thin aia nuam leh ropui kha khawvelah a awm thei tawh thin lo a ni. Kei chu kan Christmas hun lai hian Bethlehem khawvel chhandamtu piannaah hian min dah ta se, ka lung a len tlat ka ring a ni.

2. Boruak awmdan:
Pawltlak (fall) a lo ni a, khaw awmdan a lo nuam em em a, monsoon furpui, khan min tinsan tawh a. Rannung tam takin thlasik-chawlh (hibernation) hmangin lei kuaah te an tlanbo zo ta a, A bikin Leia tleng/ vak chi Reptilia leh mi seh thei chi chu an bo duak tawh a; zan boruak pawh a nuam a. Ramhnuai a lo tuihul a, ramvah pawh a nuam a. Pawltlak an tih hi Mizoramah ngei pawh thlasik intan hun a lo ni a. Buhpui-senghun, Thingrah leh thlairah, chi tinreng seng hun leh rah tlan tur pawh a lo tam ta a. Mizoram ngawpui-chhung, vah ngai lovah Phuanberh leh Kawlkar, Khuangthli te chu an lo rahin thal chhoah an rawn hmin dawn a, ram dang hla tak tak atanga rawn pem khawmin sava chi tinreng an lo kal khawm a. Hnahkhar te, chawmzil te etc., vaiva, tawllawt, changsen, kawlrit, tukkhumvilik thlengin an rawn fuan khawm dawn a ni. An ri dur dur a, lei lamah Vazar rual leh Chepa te chu Vakulin a lo ho bawk a. Heng zingah hian Varalthi pawh ngawirengin a lo fu ve a. An chet sawn ang zelin a lo zui ve a. Nuam a ti ve em em hmel tho a ni. Koro luvar ho phei chu tlangkar lui ruamah an hram noh noh thin. Chutih laiin Tlangdeng kham pang lama Zawng rual riahna lam pan ho pawh an lo in seh te ve tuar tuar a. Mizorama hun nawm lai ber a ni a. Zokhaw lamah chuan Loneimi (Farmer) an tam ber a, tun hma lam phei kha chuan buh an thar hnem phei chuan buh chhekin a chhunzawm chho a. Feh kawng dam deuh lai, fur laia sawntlung lei vantlangin an rah khuar te pawh Thlasik khawroin a hmehsawn tet avangin an khi khuar reih ruih hlawm a. Mizoramah chuan kan hun nuam lai ber leh mipui hlim lai ber a lo ni tawh a. Serthlum leh Sisu te a ei theih in, a hmin tawh bawk a. Fehkawnga han ei te chu a rim a thiang thei hle a ni.

3. Zokawlam Boruak:
Christmas a lo hnai tak tak tawh a, Christmas hmaa buh chhek zawh hram te pawh lo nei mi te chuan an tum hram thin a ni. Chung hun hlimawm tak maiah chuan buhchhek bun hawlam ten, Kan hrang hlui Patea (1894-1950) te hla mawi tak chu Krismas hmuah nan an aupui vawng vawng thin.

Lal pian hun pangpar a vul leh ta;
Thinlai mu hnu lunglen a kaitho e,
Van hnuai mihril Bethlehem tlang chungah;
Rinin thlain mi an thlawk a,

Aw ka Lal nun nem Nangin min hruai zel a
I chun leh Zua kar ah senlai nauang,
I tahna hmun tual ka ngai

Bethlehem Arsi a eng leh ta,
Eden thlan kawng khar chhung a rawn chhun eng
Harhin tho ru Eden khua a var ta,
Kan tum ram chu i pan zel ang…..

Ngawpui damngaw feh kawnga kal pahin an sa vawng vawng tawh thin a. Heng hla thute hian kan ram la tawn ngai miah loh Eden, Bethlehem, Kalvari, Palestinian ram daih a ni a sawi ni. Kan Krismas hla tam tak chuan, Kaisara Lal lai hun te, Rome ram awp lai Mediterenian tuipui kam hual vel camel thlalera zinna chi, kan ram lamin kan neih ve reng reng loh chanchin min hrilh ber a. Chuvang chuan a hma lama pianna ram (Origin ) zun kan sawi ang kha kei mahniah khan a rawn thlen ve lo va. Hmuh loh ramin lung a ti leng thei lo. Chuvang chuan Mizo Upa te chuan “Piang lo ngaiin an tap ngai lo,” an lo ti thin a ni. Mahse kan pian atanga kan nu leh pate leh boruak hun nuam, min chawi liantu hunpui “KUT, Kan nu leh pa ten min lo hlimpui hun kha a lo thlen thin vang zawk a ni. Palestinian ram leh min chhandamtu leh chhandamna thu lam ngaih vang pawh a ni hran lo va. Kan boruak nuam tak maiin hun ngai te a rawn thlen leh vang zawkin, hun nuam, Tlangsam par te, Zamzo par, Tlaizawng par ten a hun ngai an rawn herchhuahpui leh thin vang zawka lungleng kan ni. Mahse, kan zing ah, kan chhungte, kan nu leh pa te, kan u te, kan nau ten he hunpui hi mual min liam sanin, min hmanpui ve tawh lo, tam tak vanduai lusun avang ten kan kim tawh lo, a then ten rihsang mual an liam a; chung kalsan chhungte tan chuan tah vawng vawngna a tling thei a ni. Nupa tang then te tan lek phei chuan chu hunpui chu a ke a bai tlat tawh a. A rual rem tawh lo va, tih fuh loh chang te chuan hnuk a ulh teuh mai thin a ni. A lunglenthlakin, khawharna, fam ngaih leh mal riaua inhriatna a awm thei bawk ang

4. Khawpui Christmas:
Aizawl khawpuiah chuan krismas ruai ropui tak takin kan hmang a, chaw chihrang hrang pawh a tam em em a ni. Mahse Khawpui Boruak air polution a tam em avangin, ruai rim pawh a rim tui zo lo va. Engkim mai hi dan phung pangngai (formality) a ni satliah ringawt mai a. Leng khawm zai tui a awm thei lo va. Tui tak maia han zai theih te chu a vang khawp a ni. Mahse thingtlanga hah tak maia kumpui lingleta hnathawkte tan chuan krismas-a vawksa buhchiar, hnahthial ngei maia phaitual hnim chung ngeia han eiho kha a tui a ni. Boruak a thiang a, air polution a awm ve lo va, phul phaitual hnim chunga ruai an han siam a, Vawksa Buhchiar leh Hnahthial hring in-kang rim te chu rim tui tak a ni. Phul hnim piah sirah tlangsam par te chuan min lo hual tiai bawk a. Thlasik a ni a. Khawthlang lamah Niin min her san bui tawh thin avangin khua pawh Khawzo deuhah chuan a lo vawt deuh vur tawh bawk nen. Ruai tui tak leh ropuina ber zawk kha mihring thinlung hlimnaah hian a awm tlatin ka hria a. Engkim hi nei mah ila thinlung a hlim miau si loh chuan ei tui a harsa a. Hei hi tehna chikhat a ni ve ngeiin ka ring a. Kan thinlung a hlim chuan hah reng reng kan hre lo va, krismas ruai nghaka kan tlaivar thin pawh hi taksa chuan a haw vak lo. Kan hlim a, nghah kan nei a. Alexander Pope-an “Hope makes a man humble” a tih ang khan – beiseina – hmabak ko tak khan hlimna mihringteah a pe chhuak ve reng a ni. |halai lam lahin Kutpui urin Ar kan/party pui tur an zawng a, Christmas hmanpui tur tumtawk hmuh ngei kan tum hlawm mai thei. Mahse heng Kut kan la runthlak lutuk erawh, chintawk kan neih a ngai a, nu leh pa ten thalaite an hman pui dan tur tawk erawh an thiam a tha. Chuti lo chu “William Shakespeare-a’n “Kut pui a tiak Val an val reng, La erawh an la zui lo,” a tih ang kha kan tawn a hlauhthawnawm a ni. Khawpui cheimawi kan intih hmuh a, han ngaih mai chuan thil tha tak niin a lang a. Kan chei a, kan tih lan duh thil te chu Europe ram Christmas an hman dan hlim thla Thingtanga Vur tling lem te, kan ramin a hrin ngai reng reng loh ramvawt sakhi (stag) lem te pawisa tam tak tak sengin kan insiam siak ta hluai thin hi chu inkhualtelem a ang thin hle a ni. Kan Hnam Hlimthla a vang khawp mai. Mi Dawnril (naturalist) tan chuan a ho ngawt ta ve ang.

5. Krismas tiak:
Krismas a lo tiak a, thingtlang lamah bawk krismas chuan zun a nei sang leh a. Chul ram kal te chu a lunglenthlak zual lai a ni ngei ang. Krismas hmaa kan lo hmunhma te pawh an lo chul ve ruih a, buar thau par te sut len chum chum tur an lo awm tawh a. Tin, an chhek in leh an buhchhekna te chu sazuin a lo dai chiar nii niai a, chhekin velah chuan sazu te leh mimsirikut leh thuva ten an lo thai chiar niai a. Tin, kawnglaiah/ fehkawngah lailen sava man phak deuh si lovah, hmalamah a thlawk zel a, min hlat deuhah a tum leh thin a. Feh Kawng Tui-tlan ah chinrang te pawh an lo su zak zak a. Chhehrawp vau mauruaah mimsirikut ten an lo chuk-churi kur kur ve bawk a. Thlawhlaiah han kal ila Chipte te chhawhchi ningnawi tlan an rawn thlawk chhuak hum hum a, thing ding roah an fu a. Vausialah mautuaiterek lo chawr thar, nge Tlaichawr kan ti dawn, baia han thlak te chu a tui duh hle a. Mahse hei hi chu thil awm zen zen a ni lo va, ram pui deuhah chauh lo chuan mautuai awm theihna hun a ni tawh lo. Bawkbawnte, hmarchapuite chu an lo rah sen tiar a, Bete leh Bepuithlanei te Tumthangpar te chu Khuai ten an lo bawm niai niai a, a lunglenthlak em em a ni. Kumpui lingleta Mizo ten kum khat thak, hun pumpui an lo hman na, an han kal san tur chu a lunglenthlak ve viau thin a ni.

Lallungawi kum hun lawmawm chu
Tunah kan thleng leh ta
Chuan zel ila Bethlehem dai hmun saw Vanmi te zai remna

Aw Nang Bethlehem ka va ngai tak che em
I tlang chung a hruaitu Arsi eng chu
Tapin ka rawn zawng zel a che
Ka Lal pianna leihmun tlawm ber chu

Ngai lo awm ang maw chu hmun chu
Ka Lal siang a lawina
Kaisar lallai nitla zam vel hnuaian
Ka Lal nau ang tap e.

Heng hla thu te pawh hian Palestina ram chanchin leh Rom ram rorelna chanchin te a sawi a ni. Mahse kan ram ngaih leh Lunglenna ram dik tak zawk chu, Chhungkim lai leh kan ram boruak leh thenrualte nena kan hlim lai ni te a ni daih si a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy