Grassroot Badminton League-ah India-a badminton hruaitute lo tel
Grassroot Badminton League-ah
India-a badminton hruaitute lo tel
1st Mizoram Grassroot Badminton League 2024-2025 chu Mizoram Badminton Centre Zuangtui-ah neih a ni a, Inrinni khan neih zawh a ni.
He Grassroot League final hi Badminton Association of India vice president leh National Badminton chief coach Pullela Gopichand leh TATA Trusts head of Sports Neelam Babardesai rawn zin denchhena neih a ni a. Category 11-ah inel niin, Badminton Grassroot Centre kalpui tha leh coach titha hnenah chawimawina lawmman hlan a ni.
Inrinni zinga a kharna hmanpuitu Sports & Youth Services minister Lalnghinglova Hmar chuan 2036-a India-in Olympic thlen a tumah Mizoram thalai a tam thei ang ber an tel theihnan hma lak zel a, sports discipline hrang hrang zingah badminton chu Mizote tan India leh khawvel level-a kan lan theihna a nih a ring a, Olympic-ah pawh kan inlan theihna discipline pakhat a nih a beisei tih a sawi.
Tun dinhmunah India aiawh turin H Lalthazuala leh C Lalramsanga te thlan an ni tih sawiin, an dinhmun anga ding thei thalai tam tak chher chhuak thei dinhmunah Mizoram Badminton Association chu a ding mek tih a sawi a ni.
Pullela Gopichand Gopichand pawhin kum 1994-ah India badminton-in a hun tawn hniam ber a tawn thu sawiin, Commonwealth Games-ah sawrkar laipuiin player a tir loa, chumi hnuah kalphung mumal tak nen coaching kalpui a ni a, kum 30 dawn a ral meuh chuan India-in World No.1 thleng phak pathum neiin, World Championship 15 an la thei tih a sawi. Mizoramah pawh kum 2017- 2018 inkar atangin kalphung mumal tak neia training kalpui tan niin, kum 5 a liam deuh choh a, India team-a tel thei player pahnih a nei a, India state dang atangin hetiang nei thei an awm lo tih a sawi a ni.
Tun dinhmunah Mizoramah District Badminton Association 13 a awm a, club 220-in affiliation tiin, player 9729-in heng club-ah hian registration an ti.
Grassroot Centre 25 kalpui a ni a, chu’ngah chuan training mek naupang 1095 awmin, mipa 694 leh hmeichhia 401 an ni. Champhai leh Kolasib-ah Elite Centre a awm a, hengah hian player 27 (mipa 14 leh hmeichhia 13) an inzir mek. Regional Competitive Training Centre Zuangtuiah full time-a training nei mi 25 an awm mek bawk.