Great Britain in knockout round an lut

Tennis-a ram hrang hrang mipa team inelna lian Davic Cup finals khelh mekah Great Britain chuan an khingpui Australia an hneh a, group stage paltlang in, knockout round an lut. Inkhel dangah 2019 champion Spain an tlawm ve thung.
Great Britain hian Australia lakah bul an tan tha a, Davis Cup a khelh hmasak berah Jack Draper chuan Thanasi Kokkinakis lahah hnehna chhinchhiahtlak a chang. Drapper leh Kokkinakis te hi an inhnehtawk hle a, set thum chhungin tie-break vawi hnih an khel hial nghe nghe. Set khatnaah game an inlak chhawk zak zak hnuin tie-break-ah Kokkinakis a chungnung zawk a, set la hmasa zawkah a tang.
Set a hloh hmasak hnuin Drapper a insiamtha thuai a, set hnihnaah game thum chiah a hloh a, set a la let. Set khat ve ve an lak hnuin inkhel hmuhnawm an lantir chhunzawm a, tie-break khelh a ngai zui leh, Tie-break-ah Drapper a chungnung ve ta thung a, set a la nawn leh a, 6-7 (6-8) 6-3 7-6 (7-4) in hnehna a chang zui ta a ni.
Jack Drapper a chak hnu hian GB inngah na lian Dan Evans chuan Alex de Minaur a hmachhawn zui ve leh a, set khat hloh chungin Evans hian 6-1 2-6 6-4 in hnehna a chang ve leh. Single lamah an chak ve ve laiin doubles-ah GB tana inkawp Evans leh Neal Skupski te inkawp chu an khingpui lakah 7-6 (7-5) 6-4 in an tlawm ve thung.
Davis Cup group stage-a inkhel dangah kum 2019 champion Spain in bul an tan tha lova, Czech Republic hneh lovin an tlawm. Group A lama inkhel dangah an tualzawlah hnehna chang tura rinkai Italy chu Bologna a an mikhual Canada lakah an tlawm ve bawk. Team ngaihven hlawh zinga mi USA chuan Group A-ah harsa takin hnehna an chang ve thung.