Greece lakah England an tlawm

Ningani zan khan UEFA Nations League 2024-25 khelh chhunzawm a ni a. League B lama inkhelah England chu an mikhual Greece hneh lovin an tlawm. Inkhel dangah Republic of Ireland chuan a vawi khat nan hnehna an chang ve thung.
Manager lailawk Lee Carsley hnuaia bul tan tha England hian an khelmual ropui Wembley Stadium-ah Greece an mikhual a, Greece nen hian League Bm Group 1 hmahruaitu nih an inchuh. Hmahruaitu nih inchuhna inkhel pawimawh takah hian Englang chu Lee Carsley hnuaia a vawi khat nan an tlawm.
England hian hliam vangin an captain Harry Kane an chhawr thei lo. Kane awm loh vangin manager Carsley chuan striker pangngai a chhawr lova, Jude Bellingham chu tlarhmaah a dah. Midfielder Bellingham hi Phil Foden, Anthony Gordon, Bukayo Saka leh Cole Palmer ten an chawm rawn. Three Lions hian Harry Kane awm lo an tuar viau a, an tlarhma a hriam tawk lo. An mualah khel chhe lem lo mah se chawlhlawk hmain goal an thun thei lova, Greece pawhin an hun tha neih an hlah ve bawk a, chawlhlawk hmain goal thun thei an awm lo.
Chawlhlawk hmaa goal thun thei an awm loh hnuin chawlhlawk hnu lamah goal thum ngawt a lut ta thung. Second half tan atanga minute lina lekah Vangelis Pavlidis chuan Koulierakis siamsak atangin hmahruaina goal a thun nawlh. Team lian lakah goal thun hmasa zawk an nih vangin an phur viau a, inrintawkna sang zawk nen Wembley Stadium-ah an inlan chhunzawm.
England hian an si phurh sut tumin tan an khawh nasa hle a, beisei angin goal an thun lawk thei lo. Hun rei tak chhung si an phurh hnuin hun tawp dawn hnaih minute 87-naah Jude Bellingham chuan Dominic Solanke siamsak atangin goal a thun a, an si phurh a sut. Bellingham goal thun hmangin Three Lions hian tlawm an pumpelh thei ngei tura ngaih a ni mah se Greece in goal an thun belh leh thuai thung. Hun pek belh tawn dawn hnaih minute 90+4-ah goal hmahruai thuntu Vangelis Pavlidis chuan Greece hmahruai nawn lehna goal a thun a. He goal hi England in hun tawp thlengin an sut thei lova, an mualah ngei Greece hneh lovin an tlawm ta a ni.
Tarlan tawh angin manager lailawk Lee Carsley hnuaiah England hian bul an tan tha Nations League-ah hnehna an chang zawn. Vawi hnih an chak zawn hnuin Wembley Stadium-a an mikhual Greece an hneh lova, a vawi khat nan an tlawm. Greece lakah an tlawm vangin England hi League B, Group-ah pahnihna an ni a, vawi thum chak zawn Gree chu point thumin an phak lo mek.
England tan Greece laka tlawm hi chanchin duhawm lo tak a ni a. Greece laka an tlawm tum hian England leh Arsenal player pawimawh Bukayo Saka a inhliam a, hei hi England leh Arsenal tan chanchin duhawm lo dang a ni. Saka hi minute 51-naah hliam vangin lakchhuah a ni a, Chelsea winger Noni Madueke-a’n a thlak. Arsenal captain Martin Odegaard chu hliam vangin a chawl mek a, Saka a inhliam leh bawk nen EPL a champion tum Arsenal chu hliamin a tibuai chhunzawm zel.
League B, Group 1 a inkhel dangah Republic of Ireland chuan season thara a vawi khat nan hnehna an chang nawlh a, Mimuala an khingpui Finland chu 2-1 in an hneh.
Finland hian an mualah bul an tan tha viau a, minute 17-na lekah Joel Pohjanpalo chuan hmahruaina goal a thun nghal. Hma takah goal thun mah se an him reng thei lova, Repulic of Ireland tan hian minute 57-naah Liam Scales-a’n an si phurh a sut hnuin Robbie Brady chuan minute 88-naah hma an hruai letna goal a thun a. Season thara a vawi khat nan hnehna an chang zui ta a ni.
League B, Group 1-ah hian England hnehtu Greece hi vawi thum an chak zawn a, khelh thum atanga point 9 hmuin table-a hmahruaitu an ni a. England in point ruk an hmu a, Republic Of Ireland in point thum an hmu laiin vawi thum tlawm zawn tawh Finland in point an la hmu ve lo va, table mawngphah an luah nghet.