Green area 60.67%; Kawngpui hi….?

Tun hnaia chief minister hova ‘Advisory Committee on Assam Rifles Land’ thukhawm chuan Lammual chhehvel Assam Rifles chhuahsan ram hman tangkai dan tur Master Plan siamthat an thlir a, he ruahmanna thar ber ang hi chuan, a ram zau zawng zaa 39.33 chu mipui mamawh hmunhma sakna (built -up area) tur niin, a dang zaa 60.67 chu hmun hring ‘green area’ atan ruahman a ni.
Ruahmanna hmasaah khan, mipui mamawh hmunhma sakna atan 52.57% ruahman chhin kha a ni a, tuna ruahmanna tharah hi chuan 39.33% tih a ni leh ta a, a bak zawng 60.67% chu Khawpui Chuap (Lung of the City) atan zuah a ni dawn ta a, chumi awmzia chu, a ram zau zawng hmun ngaa thena hmun thum chu boruak tha siamna khawlpui atan ruahman a ni ta, tihna a ni.
Advisory Committee-ah hian chief minister chu chairman niin, home minister chu vice chairman a ni a. Official member 16 bakah invitees, pawl pawimawh tak tak 14 aiawh an tel bawk a. Pawl 14 aiawhte an tel ve bawk avang hian, he advisory committee thurel hi ‘mipui aw’ tih theih a ni mai awm e. Tuna ruahmanna thar ber hian, pawl hrang hrang duhthusam ‘thinghmun zau tak zuah’ ngenna awrawl kha a ngaihpawimawh ta a ni. Eng ruahmanna pawh siam ni se, mipui kan thuhmun thei lo a, a sawisel tawk chu an awm reng dawn tho.
Tuna ruahmanna tharah hian kawngpui thar, ‘lammual ring road’ tih theih tur ruahman tel a nih bakah, tuna kawngpui awmsa pawh a theih anga tihzauh ni se tih a ni a.
Public tana AR ram hman tangkai dan turah hian, Assam Rifles hotu lawk thenkhawt pawh khan khawpuiin kawngpui zau leh tha a mamawh dan kha an vei ve hle ni tur a ni, ‘sipai kan chhuah hunah chuan, kawngpui zau nuam tha tak in nei thei tawh dawn a nih hi’ an ti nghe nghe a ni.
Eng pawh ni se, mipui pankhawm tur chi helai hmunah hian dah belh sauh sauh a nih dawn avangin, a lawiluhna kawngpui zau tha tak siam hi chu a pawimawh hmasa ber dawn tih a lang chiang hle a ni.