Group C leh D inchinfel zan

Euro 2024 khelh mekah Group A leh B te chinfel a ni tawh a, zanin hian Group C leh D chinfel a ni ve leh dawn. He group ah hian team lian England, France leh Netherlands te an awm a, chu chu an inchingfel tur tingaihnawm zualtu tur an ni.
Ngaihven hlawh England
Player lar tak tak, season liam taah club tana chetha tak tak kawl khawmtu an nih miau vangin England in ngaihven an hlawh a. An match hmasa pahnihah beisei an phak loh vangin ngaihven an hlawh leh zual. Three Lions hian Slovenia an hmachhawn dawn a, manager Gareth Southgate-a’n engtin nge player a rem ang tih chu football ngainatute hriat chak a ni.
Boruak nei lian tak England hian Serbia hmachhawnin bul an tan a, si khat faiin chak hram mah se beisei an phak lo viau a, khel tha tia sawi tur an awm meuh lo. An match hnihnaah Denmark hmachhawnin, beisei an phak lo leh zual. Denmark lakah hian tlawm an pumpelh hram a ni ber mai a, vanneihthlak takin point an hmu. Khel tha lo viau mah se khelh hnih atangin point li an hmu a, an dinhmun a chhe lem lo thung.
England hmachhawn tur Slovenia hi Denmark lakah mit la takin an inlan a. Denmark lakah point an hmuh hnuin Serbia nen an inhnehtawk zui leh a, khelh hnih atangin point hnih an nei mek. Last 16 lut chiang turin England lakah chak an mamawh a. Three Lions lakah hian tlawm an pumpelh thei a nih pawhin last 16 luh beiseina an nei zui thei thung ang.
An khingpui tur England hian insiamthat tumin tan an khawh mek a, an insiamtha hman a nih chuan Slovenia tan hneh an har dawn a. England hi boruak rit takin a delh lak ata talchhuak hman lova, an talbuai chhunzawm a nih erawh chuan Slovenia hian inlehthalna lian an thlentir thut thei bawk.
Player hrawl tak tak nei mah se Gareth Southgate-a’n a chhawr thiam tawk lova ngaih a ni a, sawi sel pawh a hlawh hle. Midfield-ah midfielder pawh ni lo Trent Alexander Arnold a chhawr lui tlat a, vawi hnih an khelh tawhah a tifuh lo ve ve. Kawppui a neih that loh vangin Arsenal midfielder tha Declan Rice a zalen lova, beisei angin a la khelchhuak thei lo. EPL a player hmuhnawm Phil Foden a nil tluang zel a. La Liga player tha ber Jude Bellingham-a’n beisei a phak lo rih viau bawk, Chutiang bawkin, Bundesliga top scorer Harry Kane pawhin a la che ropui lo viau bawk. Chu chu tuna England team an ni a, insiamthat thuai an mamawh. Zaninah hian an insiamtha thei lo a nih chuan rawhtuina meipui paltlang turin mei sa zawk an hmachhawn a ngaiin a rinawm.
Group C atangin team huaisen pahnih Denmark leh Serbia an inhmachhawn dawn bawk a, a hmuhnawm dawn. Team anga khel thiam, team thawk ho tha tak Denmark hian Slovenia lakah bul tan fuh lo mah se England lakah team hlauhawm an ni tih chiang zawkin an lantir tawh a, Serbia hneh turin an inringtawk hle ngei ang. Serbia an hneh a nih chuan point 5 an hmu ang a, last 16 an lut ngei ang. Last 16 lut thei turin Serbia tan chak ngei ngei a ngai tawh thung.
Group C a mite hian zan dar 12:30-ah an khel dawn a, en ngei chi a ni ang.
France leh Netherlands dinhmun a tha
Group C-ah team lian pahnih; France leh Netherlands te an awm tlang a, an ni team lian pahnihte hian point 4 ve ve an hmu tawh a, an dinhmun a tha thawkhat a ngaih a ni. Netherlands leh France te hi an inkhel tawh a, point an hmuh ve ve vangin an dinhmun a that dun phah.
Player nei tha tak France hian Euro 2024 a tla chiang hmasa ber Poland an hmachhawn dawn a, an kawng a awl phah deuh tura ngaih a ni. Euro 2024 ah hian point inang an awm a nih chuah head to head en hmasak tur a ni a. France leh Netherlands in point li an hmu tawh a. Pathumnaa awm mek Austria lakah An tlawm leh bawk vangin Poland tan pathumna nih theih a ni tawh lo. Hei hi Euro 2024 atanga tla hmasa ber an nih chhan a ni.
Netherlands hian inelna neih meka khel tha tak Austria an hmachhawn dawn a, a awlsam dawn lo. Austria hian point thum an hmu tawh a, point thum a hmuh belh thei lo a nih pawhin point khat lek hmuh belh pawh an tan a pawimawh dawn lutuk a, point khat tal hmuh belh tumin thapui an thawh ang. Netherlands lakah tlawm an pumpelh thei a nih chuan point li an hmu ang a. Point li chu last 16 an luhpui theih a beiseiawm viau bawk.