Euro 2024 khelh meka group ngaihnawm, vawi hnih theuh khelha point 3 vek hmu thei Group E chu nilai zan khan chinfel a ni ta a. Point li vek hmu chungin Romania, Belgium leh Slovakia te an tlang a. Uiawm takin Ukraine an tla ve thung. Anni group hian khel hnih atanga point 3 hmu vek thei record an lo siam tawh a. Khel li atanga point li hmu vek thei record an siam chhunzawm leh bawk.
Group ngaihnawm, football ngainatute ngaihven hlawh takah hian Romania leh Slovakia te 1-1 in an inhnehtawk a. Football a ram lian Belgium leh Ukraine te goal awm lovin an inhnehtawk ve thung.
Romani leh Slovakia te hi Frankfurt Arena-ah an inhmachhawn a, inkhel hmuhnawm tak an lantir. Inkhel hmuhnawm takah Slovakia in bul an tan tha a, goal thun hmasa zawkah an tang. Inkhel tan atanga minute 24-naah Ondrej Duda chuan hmahruaina goal a thun. Inkhel pawimawh takah goal thun hmasa zawk an nih vangin Slovakia tan last 16 a hnai viau tawh.
Hnufual zawk an nih hnuin Romania an insiamtha thuai a, chawlhlawk hmain an si phurh an sut. Penalty an hlawhchhuah chu Razvan Marin chuan minute 37-naah chiang takin a pet goal a, an si phurh a sut. Chawlhlawk hmain goal hnih lut bawk mah se chawlhlawk hnu lamah goal a luh belh thei lova, 1-1 a inhnehtawk in inkhel tawpah an lawm ve ve a, last 16 an lut ve ve a ni.
Group E-a inkhel dangah chak tura rinkai zawk Belgium in Ukraine lakah tlawm an pumpelh hram a, point khat hmuin pahnihna an ni a, last 16 an lut. Belgium bul tan tha tawk lovin, goal chhuah teuh viau thin mah se hun tawp dawn hnaiah Ukraine an hlauhawm zawk a, an hun tha an hlah vangin point thum an hmu zo lova, uiawm takin an tla zui ta a ni.
Group E champion Romania
Get real time updates directly on you device, subscribe now.
Prev Post