Group YMA-in Tlabung atanga bungrua luhtir khap

Borapansury-a Mizo police-te chunga khawtual mi thenkhatte chet dan nghawng kal zelah Khawthlangtuipui group YMA chuan Chakma-te nena inkalpawh, bungrua inlak tawn an khap tih an puang.
Tlabung leh a chhehvela YMA branch hrang hrang inzawmkhawmna, Khawthlangtuipui Group YMA hian Borapansury-a thil thleng thlirhoin Nilaini khan an thukhawm a. Vawiin – August 22 atang hian ei theih lam chi leh ei theih loh lam chi thlengin Chakma khuaa pek chhuah an khap bakah Chakma khua nena inkalpawh an remti rih loh tih sawiin, khaw chhunga Chakma-te pawh pawna chhuak lo turin an chah.
Khawthlangtuipui Group YMA chuan, tunhma deuha YMA leh YCA hruaituten ‘Chakma khuaa Mizoten buaina an siam palh a nih pawhin YMA kutah hlan thin ni rawh se’ tia thu an lo dah tawh chu bawhchhiat a ni tih sawiin, tun tuma thil thlenga mawhphurtute lakah thubuai siamsak an phut tih an sawi.
MZP Sub-Hqrs Tlabung pawhin August 20 zan atang khan Tlabung khawchhunga awm Chakma-te chu an sahimna atan pawna chhuak lo turin an hriattir a ni.