GST tam zawk luh theihnanTaxation thuam chak an rawt

GST tam zawk luh theihnan
Taxation thuam chak an rawt
Mizoram Resource Mobilisation Committee (MRMC) hnuaia Sub-Committee on Tax and Non-Tax chu an chairman Haukhuma Hauzel hoin Zirtawpni khan an thukhawm a. Mizoram sawrkara Goods & Service Tax tam zawk a luh theih dan an ngaihtuah.
Mizoram sawrkara GST tam zawk a luh theihna turin Taxation department thuam chak a pawimawh tih hria in, a bikin Intelligence leh Enforcement Wing tichak tura sawrkar ngen tha tih a ni. Taxation department pawh an work force neihsa ang ang hmanga hna tam zawk thawk thei tura insiamrem tura ngen tha an tih bakah an hnathawh tichak turin a tam thei ang bera information technology hmang tangkai turin thurawn pek tha an ti bawk.
Sawrkara department hrang hrang, works khawih thintute chu sawrkara GST a luh tam theihna tur zawnga hnathawh dan ngaihtuah thin tura ngen an rel a. Hei bakah hian mipuiin awlsam zawka chhiah an pek theihnan Aizawla sawrkar building hmun remchang laiah mipui tan Taxation department site office hawng turin thurawn pek an rel.
MRMC Sub-Committee on Tax and Non-Tax thukhawm hian GST registration nei tawhten tuna chhiah an pek aia tam an pek theihnan leh registration ti ve lo, kum khata cheng nuai 20 chuang lalut tam zawk ziahluh an nih theihnan nasa zawka hma lak nise, service tam zawk, entirnan – catering, picnic spot, resort leh a dangte, GST registration neitu sumdawngte chu an dawr chungah emaw hmuh awlsam theih tura an registration number tarlang tura hriattir nise an ti.