Guinness World Records Icon – Dolly Parton

Guinness World Records chu country star Dolly Parton chu Guinness World Records Icon-ah an puang a, “He superstar hnena chawimawina kan hlan theih sang ber kan hlan thei hi nuam kan tiin kan lawm takzet a ni,” an ti a, “Kan kum 70 tlin kum a lo ni a, he kumah tan ICON-a kan puang hi kan ngaihlu lehzual a, ani aia he chawimawina phu zawk midang an awm chuang lo,” an ti bawk.
Khawvel huapa hla lar eng emaw zat a phuah bakah amah ngei pawh awm mawi danglam tak nei, a zaithiam avanga kawvel hmelhriat, vawiin thlenga stage la luah lum thei a ni a, rimawi khawvel bakah lemchan lamah pawh a duai lo hle a, zaithiam chawrno lo tuaihriam leh kawng kawhhmuhtu tha tak, midangte tana inpe em em a lo ni lehzel bawk.
Dolly pawh hi kum 79 mi a ni ve der tawh a, rimawi khawvelah kum 60 chuang mah a tal tawh chhung hian studio album 66 a tlangzarh tawh a, khawvela zaithiam lar tak tak te nen zaihoin, award leh chawimawina chi hrang hrang a dawng kuh tul tawh bawk.
Rimawi khawvelah Dolly hian 1960s atanga 2020s thlengin kum 10 bi tinah US albums chart, Billboard 200 chart-a top 10 kai thei album a la nei thei vek a, 1968 khan a top 10 album ‘Just Between You and Me’ atanga 2023-a a ‘Rockstar’ album thlengin, hetiang tithei zaithiam dan tumah an la awm lo.
Dolly Parton hian Grammy nomination 51 nei tawhin, hmeichhe country artist zinga Grammy nomination ngah ber a ni a, US Hot Country Song chart-a lang thei hla 113 nei tawhin, hmeichhe zaithiam zinga he chart-a lang thei hla ngah ber a ni a, US Hot Country Songs chart-ah kum 10 bi sarih chhunga kum 10 bi tina US Hot Country Songs chart a lang thei awm chhun a ni a, US Hot Country Songs chart-a hmeichhe zaithiam zinga No.1 kai thei hla ngah ber niin, 25 a nei bawk.
A hla hit ‘Jolene’, ‘Coat of Many Colours’ leh ‘9 to 5’ te pawh keini ram thleng pawhin kan hriat lar a ni a, Witney Houston-i’n a lar pui, khawvela hla lar ber zinga chhiar ngam tur “I Will Always Love You” pawh kha Dolly Parton phuah a nia aw!